Escotet (Abanca), dono do Deportivo da Coruña, compra o FC Penafiel de Portugal
O FC Penafiel é un club histórico do fútbol portugués, fundado en 1951 na localidade homónima situada no val do Douro. A súa adquisición pode implicar que o Deportivo dispoña dun club onde formar talentos novos.
O FC Peñafiel milita na segunda división portuguesa, categoría na que finalizou a tempada 2024-25 na undécima posición dentro dunha liga de 18 equipos. Ao longo da súa historia, o Penafiel tivo varias etapas na primeira división, a última na campaña 2014-15.
Este martes anunciouse que Gradual Score —até agora dona do 90 % das accións do FC Penafiel SAD— pechou un acordo para vender a súa participación maioritaria a Iberian Football Venture, SGPS, S.A., firma controlada pola familia Escotet. Esta adquisición converte ao economista e banqueiro hispano-venezolano Juan Carlos Escotet, presidente de Abanca e principal accionista do Deportivo da Coruña, no novo referente do proxecto portugués.
O proxecto da nova propiedade céntrase en potenciar a formación e proxección de novos talentos, aproveitando que Portugal é un mercado tradicionalmente formativo e xerador de futbolistas con potencial. É dicir, o Deportivo podería acabar beneficiar atraendo talento formado nos campos lusos.
No seu comunicado oficial, o club asegurou que o novo grupo investidor comprometeuse non só a conservar a esencia do Penafiel, senón a fortalecelo institucional e deportivamente cunha mirada de longo prazo.
A administración saínte deixou claro que, desde o inicio das conversacións, a súa prioridade foi garantir unha transición estruturada que asegurase a estabilidade do proxecto máis aló do plano financeiro. O foco estivo posto en protexer a identidade, o funcionamento e o futuro do club.
Escribe o teu comentario