A alpinista e aventureira Chus Lago, exemplo das fazañas femininas "nun mundo de homes"

Natural de Vigo, Lago converteuse na primeira española en coroar o Everest sen axuda de osixeno embotellado e a primeira en chegar á Antartida en solitario. 

A deportista participará xunto a Gador Muntaner no festival 'Mar de Mares', na Coruña, que abordará a importancia de preservar os océanos.
 

A viguesa Chus Lago, primeira española en coroar o Everest sen osíxeno e en chegar á Antártida en solitario, reivindicou o seu papel de muller exploradora. "Emocióname moitísimo porque é un mundo de homes", recoñeceu.

A exploradora fixo estas declaracións durante a presentación da novena edición do festival 'Mar de Mares' que se celebrará na Coruña entre o 15 e o 18 de setembro baixo o lema 'Colle a onda'.

"'Mar de Mares' trouxo a este escenario de respecto e defensa dos océanos unha parte que xeralmente non se trae que é a exploración polar", engadiu.

Lago e a catalá Gador Muntaner ofrecerán senllos encontros nos que contarán ao público as súas experiencias e poñerán en valor o punto de vista feminino na historia das grandes aventuras no mar.

No acto de presentación, participou tamén a directora de 'Mar de Mares', Mercedes Carballo; a alcaldesa da Coruña, Inés Rey; e o responsable de Trade Marketing en Galicia do Grupo Hijos de Rivera, Pedro Astur.

PROGRAMACIÓN

Carballo explicou que o festival conta con "unha programación multidisciplinar pensada para todos os públicos e para todos os intereses" co obxectivo de reivindicar a vital importancia dos océanos e a urxente necesidade de preservalos.

"Estará presente a ciencia, a cultura, o ecoturismo, a gastronomía e este ano dunha maneira moi especial, a aventura", puntualizou.

A alcaldesa, pola súa banda, fixo un chamamento á "responsabilidade colectiva" respecto ao cambio climático e a necesidade de "tomar conciencia de que a pegada que imos deixando ten repercusión".