Cartel do Festival 17º Ribeira Sacra: The Divine Comedy, Sidonie, Baiuca, Puño Dragón, Anni B Sweet...

Listos para soltar amarras, asomarnos ao balcón ou alzar as nosas copas de viño. O que dispoña o Festival 17º Ribeira Sacra, afeito ofrecer concertos singulares en lugares que van desde unha adega até un catamarán. Nesta ocasión, e con motivo do seu décimo aniversario, a cita convoca a algunhas das mellores bandas do panorama nacional e internacional, así como a grupos punteiros da escena galega, nunha proposta sedutora para os oidos e o resto de sentidos. 

NOMEAMENTOS E ABONOS

A música non é o único atractivo deste festival, onde a natureza, o patrimonio ou a gastronomía fusiónanse facendo que cada directo sexa especial e único. Froito dese mimo polo festival, a organización acumulou varios nomeamentos na próxima edición dos Iberian Festival Awards, onde compiten en varias categorías.

Ao evento só poderán asistir uns poucos afortunados, aqueles que xa se fixeron coa primeira tirada de abonos para os máis madrugadores e incondicionais, e os que sexan rápidos o vindeiro venres 13 de xaneiro, cando sairá á venda a nova remesa, que promete durar moi pouco nos despachos de billetes á vista do éxito de anos anteriores. 

CARTEL

Entre as cabezas de cartel atopamos a The Divine Comedy, liderado por Neil Hannon, que elixiu a Ribeira Sacra como unha das súas dúas únicas paradas en España para os próximos meses, subliñando a importancia que dá o artista norirlandés a esta iniciativa. 

A continuación, atopamos dúas propostas de primerísimo nivel: Sidonie e Baiuca. A banda catalá é referencia no indie nacional e as súas cancións acompañan xa a varias xeracións contaxiadas da súa enerxía e ritmo. O de Catoira, pola súa banda, elevou a música tradicional galega a unha nova dimensión, interpretando a tradición desde a vanguadia, tanto no son como na proposta visual e escénica. 

Ben flanqueados estarán todos estes nomes por artistas como Annie B Sweet, Puño Dragón, Beira Fauna, mariagrep & Mundo Prestixio e Os Invaders, que compoñen unha vibrante mestura de estilos para esta edición onde non faltarán tampouco as sorpresas, en forma de composicións gastronómicas a cargo de chefs tan reputados como Rafa Centeno, cuxa cociña está estes meses na fala da xente ao ser o primeiro en gañar unha estrela Michelin para a provincia de Lugo coa súa proposta nos fogóns de Vertixe.