Sánchez e Scholz fan forza desde A Coruña a Macron para ter operativo o Midcat en 2025

Ante a galopante crise enerxética e despois do ocorrido no Nord Stream, os presidentes de España e Alemaña insisten ao Goberno de Francia para que rectifique.

"As necesarias conversacións deben incluír a todas as partes involucradas, ademais da Comisión Europea", piden durante o cume hispano-xermano que se celebra na Coruña e na que destaca a ausencia de Alfonso Rueda.

O presidente do Goberno, Pedro Sánchez e o seu homólogo alemán, Olaf Scholz, reclamaron a construción do gasoduto Midcat para que estea operativo no ano 2025. Ademais, instaron a todas as partes involucradas a negociar. Deste xeito elevaron a presión sobre o presidente de Francia, Emmanuel Macron, principal detractor do proxecto.

No plan de acción conxunto que asinaron ambos os países, ao que tivo acceso Europa Press, sinalan que a construción dun gasoduto que cruce os Pireneos é de "crucial importancia" e mencionan o ano 2025 como a data na que debería estar en funcionamento.

Así, sinalan que este é o modo de lograr un "verdadeiro e robusto" mercado interno da enerxía na Unión Europea, acelerar a transición verde e reforzar a autonomía estratéxica da UE. "As necesarias conversacións deben incluír a todas as partes involucradas, ademais da Comisión Europea", indica o texto.

Neste sentido, engaden que seguirán presionando para aumentar a interconexión enerxética da Península Ibérica co resto de Europa para aumentar a súa contribución á seguridade da subministración en toda a Unión Europea. Neste punto mencionan que esta infraestrutura é relevante para a interconexión eléctrica e especialmente para transportar hidróxeno verde.

Sánchez e Scholz asinaron este documento na XXV cume hispano-alemán que se celebra este mércores na Coruña e que viña moi marcada polo tema enerxético e a posición común que ambos manteñen a favor do gasoduto Midcat.