​Os eventos gastronómicos darán cabida a actividades que fomentan a reciclaxe

A Consellería de Medio Ambiente, en colaboración con Ecoembes, levará a campaña 'Separar con xeito' a 350 feiras e eventos gastroculturales, co fin que fomentar prácticas responsables en torno ao reciclaxe de plásticos, envases lixeiros, papel e cartón.

O punto de partida desta iniciativa será a feira Xantar, que se celebra a partir deste mércores e ata o domingo en Expourense.

Con esta acción, buscarase promover a economía circular a través da reciclaxe de envases e concienciar aos asistentes a este tipo de eventos sobre a importancia da reciclaxe dos envases que se depositan no colector amarelo (envases de plástico, latas e briks) e no colector azul (envases de papel e cartón) para o coidado do medio ambiente.

Ademais de instalarse puntos de reciclaxe para facilitar a correcta separación de residuos que se poidan xerar, realizaranse actividades formativas para que os asistentes coñezan a maneira máis fácil para facer unha correcta separación dos residuos.

Tamén se habilitou unha páxina web na que se pode consultar o calendario no que se recollen todos os eventos nos que terán lugar esta acción e a súa localización, así como consellos para reciclar.