Marea de Vigo propón a creación dun novo Consello Municipal de Cultura

O grupo municipal Marea de Vigo propuxo este martes a creación dun Consello Municipal de Cultura, para deseñar as políticas da cidade neste ámbito, elaborar un plan museístico e impulsar a participación dos axentes sociais e dos cidadáns en xeral. Así o anunciou Xose Lois Jácome, concelleiro do partido, argumentando que esta proposta loita contra as políticas culturais de Abel Caballero. "Non se pode facer política cultural a golpe de improvisación, nunha cidade onde o tecido cultural é ninguneado, ante a inacción do concelleiro de Cultura", aseverou.

Pola súa banda, o portavoz do grupo, Rubén Pérez, puxo como exemplo a incerteza sobre o futuro do MARCO e lamentou que se vaia a converter nun "museo de ocorrencias" ou nun centro 'ad hoc' para as exposicións promovidas polo grupo empresarial dono dun xornal. "O MARCO ten que ter un director, e unha programación ligada á arte contemporánea", incidiu.

Así, Marea propuxo crear un Consello Municipal de Cultura, integrado por representes políticos, veciñais, de institucións culturais, artistas de recoñecido prestixio, entre outros. Este órgano podería deseñar as políticas culturais, decidir a localización de equipamentos, planificación de museos ou a fiscalización de recursos. Todo iso, segundo indicaron, "evitaría pantomimas" como o que ocorre agora co traslado da estatua dos Rederos.

Ademais, Pérez lembrou que Vigo conta cun movemento cultural suficientemente importante e recoñecido como para que se escoite a súa opinión, polo que os políticos deben "evitar dar receitas" e "escoitar" a eses representantes culturais e artísticos.