O Goberno leva ante o TC o seu recurso contra a investidura de Puigdemont

O Consello de Ministros acordou este venres impugnar ante o Tribunal Constitucional a candidatura de Carles Puigdemont á presidencia da Generalitat de Cataluña.

O Executivo mantén o seu criterio a pesar da discrepancia do Consello de Estado. Sáenz de Santamaría explicou este venres que o Goberno cre que é a vía de "evitar que alguén fuxido da xustiza poida de forma ilexítima ser investido e poñerse á fronte dun goberno autonómico".

Podes ampliar esta información en Catalunyapress.

"REVESES XURÍDICOS"

O PSOE coincide co Goberno en que Carles Puigdemont, fuxido da xustiza, non pode ser candidato á investidura, pero considera que o "pau" que, ao seu xuízo, lle deu o Consello de Estado rexeitando a presentación agora da impugnación só é responsabilidade do Executivo. "Os reveses xurídicos son do Goberno, que é o que leva a iniciativa", apuntou.

Nos corredores do Congreso, a portavoz parlamentaria do PSOE, Margarita Robles, incidiu en que o PSOE só vai apoiar as decisións "políticas" destinadas a impedir que, xuridicamente e "de maneira adecuada", Puigdemont sexa presidente de Cataluña.

EXPLICAR AS EQUIVOCACIÓNS

O presidente de Ciudadanos, Albert Rivera, dixo este venres que apoia ao Goberno, aínda que indicou que a fórmula para impedilo decídea o Executivo e que "se se equivoca terá que dar explicacións".

Tras subliñar que en Cs sempre foron "leais" ao Goberno, afirmou que o apoiarán na decisión que tome sobre esta cuestión. Sobre a decisión de recorrer ao TC antes de que se produza a investidura, aínda que o Consello de Estado dixo que non se pode facer de forma preventiva, indicou: "Se o Goberno cre que a fórmula é esa, confiamos no Goberno. E se se equivoca, terá que dar explicacións".

"RIDÍCULO"

A portavoz de Unidos Podemos no Congreso, Irene Montero, cualificou de "ridícula" a intención do Goberno de seguir adiante coa impugnación e dixo que espera que o Executivo de Mariano Rajoy "rectifique".

"En política pódese facer de todo menos o ridículo", aseverou Montero, que acusou ao PSOE e a Ciudadanos de "apoiar" esta decisión do Executivo central. A deputada, que dixo que Rajoy non contactou con Podemos para comunicarlle a súa intención, apuntou que os tres partidos "fixeron un ridículo compartido".

Así mesmo, ante a sesión de investidura do Parlament, Montero asegurou que a súa formación en Cataluña vai votar en contra de Puigdemont e de "calquera candidato que presenten os independentistas" do PDeCAT, a antiga Convèrgencia.