Podemos Galicia quere as súas siglas nas municipais

As alianzas serán concretas en cada municipio. 

A secretaria xeral de Podemos Galicia, Carmen Santos, avanzou que a súa formación promoverá que as súas siglas "aparezan en todas as candidaturas" nas que participe en consonancia co aprobado na Asemblea Estatal de Vistalegre II para as próximas eleccións municipais, nas que apoiará as alcaldías do cambio.

Carmen Santos ofreceu este luns unha rolda de prensa, na que asegurou que a palabra Podemos "suma". Con todo, explicou que o feito de que estas siglas aparezan nos proxectos que actualmente están no goberno, como os de Compostela Aberta, a Marea Atlántica ou Ferrol en Común, é algo que terán que "falar".

"É unha liña estratéxica que vai ser para todo o Estado", manifestou a dirixente de Podemos Galicia, que indicou tamén que a súa formación buscará unha "maior participación" nos proxectos de goberno, que espera que revaliden os seus mandatos.

Así mesmo, para o resto de listas municipais, precisou que buscará acordos para presentarse en candidaturas conxuntas naquelas localidades nas que hai xa agrupacións veciñais, mareas ou proxectos que, sen ser mareas, poidan defender un programa común con Podemos.

"E, onde non sexa posible, sexa porque non hai candidaturas ou o que sexa, tentaremos conformar candidaturas propias e mesmo tamén onde non hai militantes de Podemos, se hai candidaturas que defenden o mesmo que nós, terán o noso respaldo", indicou.

ALIANZAS "CONCRETAS E ESPECÍFICAS"

Nesta liña, precisou que as alianzas que Podemos Galicia forxará no ámbito municipal "serán concretas e específicas" para as eleccións locais, cita para a que espera contar cunhas "estruturas" para "ter candidaturas gañadoras".

Así, detallou que haberá documentos marco nos que se establecerán as condicións que Podemos esixirá para ter alianzas naqueles municipios nos que non goberna. "Onde gobernamos o que queremos é revalidar os gobernos tendo maior participación e apoiándoos en todo o que sexa necesario", insistiu.