Accidente mortal nunha estrada comarcal en Rodeiro

O 112 Galicia rexistrou o accidente ao redor de 15 minutos despois das 18.00 horas. Varios particulares alertaron de que unha muller fora atropelada no quilómetro 0,5 da EP-6201, estrada que une Rodeiro con Antas de Ulla.

Con esta información, a Sala de Operacións do 112 Galicia informou o Servizo de Urxencias Sanitarias de Galicia-061, que mobilizou ao helicóptero medicalizado con base en Ourense até o lugar do accidente. Tamén acudiron a Garda Civil de Tráfico e a Agrupación de Voluntarios de Protección Civil de Rodeiro.

Con todo, o 112 informou de que, á chegada dos servizos de emerxencias confirmaron que nada puideron facer para evitar o falecemento da muller.

OUTRO ATROPELO NO Grove
Así mesmo, o 112 tamén informou de que un home que sufriu un atropelo no Grove foi trasladado en helicóptero medicalizado de Urxencias Sanitarias de Galicia-061 ao Hospital de Santiago.

Foi un particular o que deu o aviso do suceso ao redor das 16.30 horas ao trasladar que un coche acababa de atropelar a un peón na Avenida de Portugal desta localidade. O propio alertante informaba da posibilidade de que o implicado estivese inconsciente.

O 112 pediu a intervención dos servizos sanitarios, do Servizo Municipal de Emerxencias e da Policía Local do Grove.

Finalmente, o ferido foi atendido no lugar e trasladado no helicóptero medicalizado con base en Santiago.