A chuvia acumulada non abonda para recuperar os ríos e acuíferos da seca prolongada

Ríos e acuíferos non se recuperaron.

Doce subsistemas da conca hidrográfica Galicia-Costa volverán estar en nivel de prealerta, pero os outros sete seguirán en alerta por seca. Como nesta última situación se atopan os subsistemas máis grandes, por extensión, as situacións de alerta e prealerta repártense á metade na demarcación.

Así o decidiu a oficina técnica da seca, que se reuniu este venres, nun contexto no que a comunidade galega leva varias semanas acumulando chuvias.

Segundo avanzou en declaracións aos xornalistas o director xeral de Augas, Roberto Rodríguez, as zonas que rexistraron maior melloría en canto ao volume das reservas son o norte da demarcación e a área de Pontevedra, onde máis afectaron as borrascas dos últimos días.

Con todo, apuntou que aínda non se recuperou o aforamento dos ríos e acuíferos, por iso é polo que se recomenda seguir coas medidas de aforro, debido a que, segundo incidiu, aínda non se recuperou a normalidade.

MIÑO-SIL SEGUE EN ALERTA

O presidente da Confederación Hidrográfica Miño-Sil (CHMS), Francisco Marín, confirmou este venres en Ourense que os tramos galegos da conca se manterán en alerta por seca a pesar de que nos últimos dous meses "choveu lixeiramente por encima" da media e de que "a situación é moito mellor" que en decembro.

Das seis zonas da demarcación, o único cambio significativo prodúcese na zona do Sil Superior (a única zona da demarcación comprendida fóra de Galicia, entre León e Asturias), onde a mellora das precipitacións e o aumento do caudal no río permitirán que este tramo pase dun nivel de emerxencia a unha situación de prealerta.

Iso si, Francisco Marín deixou claro, tras a reunión da Oficina Técnica da Seca da súa demarcación, na que se avaliaron os distintos indicadores, que "aínda falta moito para chegar a unha situación de normalidade".

E é que, a pesar de que as precipitacións dos últimos dous meses foron "lixeiramente" superiores á media, "será moi difícil levantar a alerta en todo o territorio" da CHMS porque se parte "dunha situación difícil" debido a que as chuvias foron "un 40 por cento inferiores á media" nos últimos 18 meses.

AXENCIA AMERICANA DE METEOROLOXÍA

As previsións da Axencia Americana de Meteoroloxía, recollidas pola CHMS, apuntan que Galicia vivirá un mes de xaneiro chuvioso, un febreiro normal e que durante os tres seguintes meses as precipitacións situaranse "un pouco por encima da media".

Respecto da actual situación dos encoros, Marín destacou que "se atopan sete puntos por encima do ano pasado", cunha ocupación do 53 por cento. Con todo, lamentou que estes datos se sitúan 10,5 puntos por baixo da media habitual para estas datas.

No caso da conca do río Limia, unha das máis afectadas pola seca, confirmou que a situación "empezou a normalizarse", pero que é preciso "que siga chovendo" para que a auga chegue aos acuíferos. Tamén sinalou que neste canle a auga circula por baixo do caudal ecolóxico.