A sala de cine Numax pecha un gran ano con 30.000 asistentes as súas costas

A sala de cinema Numax proxectou  este ano máis de 150 películas en versión orixinal, sendo escollida como de referencia en España pola rede internacional Europa Cinemas. Por ela pasaron máis de 30.000 persoas, que asistiron a case 1.700 sesións. Segundo destacan os responsables deste proxecto, 2017 foi "sen dúbida" o ano no que Numax chamou a atención máis aló de Santiago de Compostela, e conseguiu "repercusión internacional".

Á parte da elección como sala española de referencia para Europa Cinemas (anunciada no Festival de Cannes en maio), Numax foi convidado a elixir o representante estatal do programa '28 Times Cine', para o que o compostelán Jesús Silva viaxou a Venecia como xurado do Festival de Venecia, xunto a outras 27 persoas de cada un dos países membro da Unión Europea.

A área de distribución de Numax, ademais, consolidou este ano a súa actividade coa estrea de catro títulos con "ampla presenza" nas listas das mellores estreas de 2017, segundo resaltan.

O laboratorio, doutra banda, conta desde o pasado marzo cun novo espazo na rúa Doutor Teixeiro. Esta ampliación débese en boa parte ao reforzo das áreas de vídeo e de comunicación, que agora ofrece tamén servizos especializados de programación web, xunto aos xa habituais servizos de deseño gráfico, con especial atención ao sector editorial, deseño web, comunicación e creación de contidos e edición e posprodución de vídeo.

O programa didáctico Numax na escola intensificou a súa actividade o pasado ano, cun catálogo de 12 títulos dispoñibles na súa versión orixinal con subtítulos en galego. Ao longo de 2017 acudiron ao cinema un total de 1.807 alumnos, o que supón un incremento do 27,6% con respecto a 2016.

Pola súa banda, a librería, que abriu con 3.000 volumes en stock en marzo de 2015, conta hoxe con 5.000 referencias distribuídas en case 7.000 volumes e un catálogo online de 20.000 títulos, sempre en aumento.