En Marea, Anova e Esquerda Unida desacreditan a iniciativa antivacinas de Lídia Senra

Lídia Senra garda silencio sobre a polémica.

En Marea, Anova e Esquerda Unida expresaron publicamente que non comparten a iniciativa presentada pola eurodeputada Lídia Senra --electa como candidata da coalición AGEe--, quen, nunha pregunta remitida ao Parlamento europeo no mes de agosto, cuestiona a seguridade e efectividade das vacinas.

A través dun comunicado, Anova --formación que propuxo a Senra para encabezar a candidatura de AGEe nas eleccións europeas de 2014-- desvinculouse da iniciativa presentada pola parlamentaria ante a Comisión de Sanidade, xa que "a posición expresada" pola eurodeputada "non foi consultada nin é compartida" pola formación nacionalista.

Lídia Senra, que declinou facer declaracións sobre esta cuestión, foi elixida eurodeputada no ano 2014 pola candidatura de coalición Alternativa Galega de Esquerdas en Europa (AGEe), formada por Anova e Esquerda Unida-Esquerda Unida.

"PRÁCTICA DE RISCO"

Aínda que a evidencia científica demostra que as vacinas salvan vidas e evitan enfermidades letais, nunha iniciativa rexistrada o 24 de agosto, Senra indica que as vacinas teñen "contraindicacións e moitos efectos secundarios que poden aparecer despois da vacinación, chegando nalgúns casos a provocar a morte".

"Non considera a Comisión que ningún Estado membro debería obrigar á poboación para someterse a unha práctica de risco e que a vacinación non debería ser obrigatoria en ningún Estado, dado que ninguén puido demostrar a seguridade das vacinas?", reza a segunda parte da pregunta presentada por Senra, que xerou unha gran polémica.

EU TACHA A SENRA DE "TRÁNSFUGA"

Pola súa banda, o secretario de Organización de Esquerda Unida, Rubén Pérez, asegurou, en declaracións a Europa Press, que non recoñece a Lídia Senra como a súa eurodeputada, xa que esta "funciona" como parlamentaria "non adscrita" polo que "non rende contas a ninguén" e actúa de forma "persoal" no seu traballo en Bruxelas.

Con todo, critica as "condenables" afirmacións de Senra sobre as vacinas, "unha opinión sen rigor e irresponsable", que "non forman parte da proposta política" coa que AGEe se presentou ás eleccións europeas de 2014 e, así mesmo, "vai en contra" do expresado polo grupo da Esquerda Europea, onde se integra a deputada galega.

Así as cousas, Esquerda Unida indicou que as afirmacións de Lídia Senra na súa pregunta sobre as vacinas merecen "explicacións", á vez que cargou contra a eurodeputada por "manter a acta" e desligarse de AGE "nun claro caso de transfuguismo".

ANOVA CRITICA A INICIATIVA

Pola súa banda, Anova trasladou que "a vacinación sistemática da poboación supuxo nas últimas décadas un avance notorio na saúde pública", xa que conseguiu "erradicar ou minimizar" a transmisión de enfermidades infecciosas.

Deste xeito, tras aclarar que "non existe ningún fármaco que careza de efectos secundarios", a formación nacionalista manifesta que as vacinas incluídas nos calendarios presentan "un balance risco-beneficio demostrado".

"Unha redución significativa na porcentaxe de vacinacións do sistema público sería un risco evidente non só para as persoas que o deixasen de facer, senón tamén para a sociedade en xeral, polo que non se debe alentar tal feito", continúa.

EN MAREA SÚMASE ÁS CRÍTICAS

En Marea tamén saíu ao paso da iniciativa presentada por Senra para desmarcarse da "posición política e científica" expresada pola eurodeputada na súa pregunta.

Así as cousas, tras aclarar que Senra non está ligada orgánicamente a En Marea como parlamentaria, o partido instrumental indica que as vacinas "salvan vidas e evitan enfermidades" e que, unha vez pasan os controis de seguridade e risco, "forman parte esencial das políticas preventivas de saúde pública".