A primeira vítima galega da gripe desta tempada non se vacinara e tiña factores de risco

Unha muller de 58 anos de idade con factores de risco e non vacinada é a primeira falecida con gripe na tempada actual en Galicia, onde se rexistraron dez ingresos hospitalarios desde o inicio da mesma.

Así consta no primeiro informe da actividade gripal en Galicia publicado polo Sergas, no que se concreta que ata a semana que acabou o 12 de novembro, declaráronse sete ingresos con virus da gripe A --cinco subtipados, que se corresponden catro a AH3N2 e un a AH1N1-- e tres ingresos con virus da gripe B.

No informe concrétase que dos sete pacientes ingresados que tiñan indicada a vacina, seis non a recibira. Ademais, engade que dos dez ingresos totais notificados desde o inicio da tempada, un dos afectados está a ser atendido na UCI e declarouse un falecemento con gripe: unha muller de 58 anos con factores de risco e non vacinada, que tamén tivo que ser atendida na UCI.

Desde o inicio da tempada de gripe en Galicia, en semana do 2 ao 8 de outubro, ata a semana que rematou o día 12 de novembro, o número de chamadas atendidas no 061 por gripe e outras infeccións respiratorias mantívose por baixo das 166 chamadas semanais, "o que se traduce nun nivel de intensidade basal".

DIFUSIÓN XEOGRÁFICA ESPORÁDICA

Nesta semana pasada analizáronse 156 mostras para virus da gripe, das que catro foron positivas para o virus AH3N2, "o que se traduce nunha difusión xeográfica esporádica da actividade gripal", concreta o Sergas.

Deste xeito, o Sergas sinala neste primeiro informe publicado que a intensidade da gripe en Galicia é "basal", con tendencia "estable" e difusión "esporádica".