Xoán Carlos I convértese no cuarto embaixador vitalicio do Camiño de Santiago

Xoán Carlos I será o cuarto embaixador vitalicio do Camiño de Santiago, distinción que o rei emérito recibiu "encantado", segundo destacou este venres o presidente da Xunta.

Feijóo deu a coñecer tras a reunión do Consello esta decisión, coa que Xoán Carlos I se converte no cuarto embaixador permanente das rutas xacobeas, xunto con Filipe VI, Vicente del Bosque e Mariano Rajoy.

En rolda de prensa, o xefe do Goberno galego destacou o "compromiso" que a Coroa "sempre" mantivo co Camiño, e mostrouse convencido de que Xoán Carlos I, que ademais "pasa bastantes tempadas en Galicia", vai ser "un gran embaixador de honra".

Así, valorou que esta medida é "algo de ida e volta", debido a que supón unha distinción para o rei emérito, pero el tamén é "un reclamo" desde o punto de vista da personalidade que é e porque ten "contactos no mundo", o que pode contribuír, segundo Feijóo, no obxectivo da internacionalización do Camiño.