Beatriz Mato confirma a súa vontade de pasar á política local

A conselleira de Medio Ambiente e presidenta do PP local da Coruña, Beatriz Mato, asegurou que lle gustaría ser candidata á Alcaldía da Coruña, pero puntualiza que "non é vontade dun", senón que é unha decisión que toma o partido.

Con motivo da súa participación este venres nun almorzo informativo do 'Fórum Europa', foi preguntada sobre se será candidata á Alcaldía polo PP nas eleccións municipais de 2019.

"Non é vontade dun o ser candidato cando forma parte do Partido Popular. É unha decisión que toma un órgano do PP e que ratifica o Partido Popular en Madrid", afirmou.

Con todo, matizou que se a pregunta en concreto é se a ela lle gustaría presentarse como candidata á próximas municipais na Coruña, a súa resposta foi clara: "A min si me gustaría", confesou.

XESTIÓN LOCAL

Na súa intervención, Mato criticou a xestión do actual goberno municipal da Coruña, ao que denominou "o goberno triplo cero" porque é "cero en previsión, cero en eficacia e cero en compromiso social".