Ferroglobe leva para Puertollano a planta de silicio prometida para Arteixo

López Madrid, polémico presidente de Ferroglobe.

O presidente do xigante metalúrxico Ferroglobe, Javier López Madrid, relacionado con distintas tramas de corrupción nos últimos anos, avanzou que a planta piloto de fabricación de silicio para placas fotovoltaicas que Ferrosolar, empresa vinculada á multinacional, está a construír en Puertollano (Cidade Real) podería estar lista "antes de doce meses".

Esta planta estaba prevista inicialmente para a localidade coruñesa de Arteixo, pero a negativa da Xunta á segregación das actividades que Ferroatlántica desenvolve na Costa da Morte (o que impediu a venda das centrais hidroeléctricas) supuxo que a compañía advertise, en xullo pasado, de que isto impedía "a realizacón do plan de futuro" en Galicia.

Durante a súa intervención, López Madrid lembrou que FerroGlobe é "o maior produtor de metal silicio do mundo", aínda que pediu "axuda" ás administracións para conseguir o "reto" de alcanzar un total de entre 400 e 500 postos de traballo.