Puigdemont en liberdade e Junqueras paga a fuxida

Puigdemont e catro ex consellers quedaron en liberdade con medidas cautelares despois de declarar ante o xuíz belga e tras entregarse como consecuencia da orde de busca e captura ditada pola xuíza Lamela.

A estratexia dos cincos fuxidos, como o viñeron manifestando reiteradamente, era demostrar que a xustiza española non era "xusta", mentres que a belga si, porque non os ía meter en prisión provisional e non os ían devolver a España para ser xulgados. É a maneira de alongar esta situación por un tempo, ata que a xustiza belga estude o caso e os envíe a España. O tempo máximo que pode durar esta situación é de tres meses, aínda que pode resolverse antes.

Manipular dicindo que en Bruxelas hai xustiza porque os deixan saír con medidas cautelares, cousa que non ocorreu en Madrid co ex vicepresidente e o resto de ex consellers, é manipular o caso e de maneira indecente cando Puigdemont e os catro ex cargos públicos son os culpables de que os seus compañeiros de goberno estean agora en prisión, por risco de fuga, así o estimou a xuíza Lamela. Se todos quedaran en Catalunya, a liberdade con medidas cautelares aplicaríase a todo o goberno cesado polo artigo 155. Así o din os expertos.

Internacionalizar o conflito -que xa lles vén ben aos independentistas para a campaña electoral que empezou hai xa uns días- forma parte da estratexia deseñada hai xa algún tempo polos seus "estrategos" pensantes.

É unha primeira vitoria que queren vender aos seus seguidores, pero isto só acaba de empezar en plena campaña electoral, onde o martes se coñecerá se se vai reeditar o pacto dos partidos independentistas e algunha persoa non adscrita ao partido para gañar a batalla. É unha ocasión de ouro para o PDeCat, que está a vivir como o seu salto ao baleiro pola súa deriva independentista lle está a custar a baixada en intención de voto. Por iso a súa insistencia nunha soa candidatura, levando tamén nesa lista a todos os que están no cárcere, como mártires do proceso. Pero ERC non está polo labor e séntese traizoada pola actitude de Puigdemont e o seu partido. Sucederon demasiadas cousas que non están dispostos a perdoar. Queren concorrer sós e despois, dependendo dos resultados, falarán.

É unha situación na que cada día se vai escribindo un novo capítulo, que serán moitos. Espéranse que sexan longos e con xogo sucio. Demostrar aos seguidores que todo marcha e que se seguen loitando a pesar de estar en prisión é manipular o conflito, como veñen facendo ata agora.

A pregunta que se fan moitos é quen está a pagar o custo dos avogados e a estancia na capital belga dos fuxidos?

Os cinco de Bruxelas seguirán, de momento na rúa, en liberdade controlada, é o que esperaban, mentres o resto de ex compañeiros seguirán no cárcere. Todo un exemplo de valentía, solidariedade e compañeirismo.

"A liberdade, como dixo Platón, é disciplina. Non é a liberdade para facer o que che dea a gana, para non ter límites. A liberdade require sacrificio: é un deber antes de ser un dereito. E non se debe confundir a liberdade coa libertinaxe; se fas iso, pérdela", dicía a xornalista e escritora Oriana Fallaci.