Atopan a unha muller falecida nunha praia de Porto do Son á que arrastrou a marea
O seu cadáver estaba espido e os investigadores cren que o mar o devolveu a terra ás poucas horas de morrer.
Praia de Aguieira, no verán. Foto: turismo.gal
A muller achada morta este luns nunha praia do termo municipal coruñés de Porto do Son "levaba poucas horas falecida", segundo informaron fontes da investigación.
Con todo, a Garda Civil explicou que a muller está sen identificar e espérase que realización da autopsia aclare as causas da morte.
Pasadas as 14,00 horas procedeuse ao levantamento do cadáver da muller que, aparentemente, ten uns 50 anos, segundo estiman as mesmas fontes.
O corpo foi atopado na mañá deste luns na praia de Aguieira, en Nebra. Foi un alertante quen, sobre as 11,00 horas, avisou do achado e indicou que el fora alertado por un veciño que asegurara ver unha persoa afogada nesta praia, cara á zona do río.
Tras recibir o aviso, o 112 Galicia alertou ao persoal do 061, a Salvamento Marítimo e ao Servizo de Gardacostas de Galicia. Tamén, a Garda Civil e os efectivos de Protección Civil de Porto do Son foron avisados.
En concreto, o 061 desprazou ao lugar unha ambulancia asistencial e un médico de Atención Primaria que confirmou no lugar o falecemento da muller.
A Garda Civil abriru unha investigación para identificar e esclarecer as causas da morte desta muller. Ademais, fontes da investigación sinalaron que non consta a desaparición na zona de ningunha persoa recentemente.
O corpo da persoa falecida estaba espido e semienterrado na area. Consideran as mesmas fontes da investigación que a marea arrastrou o cadáver a terra.
Escribe o teu comentario