Cirurxiáns do Chuvi implantan a unha muller cun tumor parte da caixa torácica feita de titanio
A prótese, deseñada de forma personalizada, substitúe esternón, clavícula e costelas e permítelle mobilidade.
Cirurxiáns do Complexo Hospitalario Universitario de Vigo realizaron unha intervención cirúrxica pioneira en Galicia ao substituír parte do esternón, da clavícula e varios arcos costais a unha paciente afectada por un tumor.
A paciente, unha muller de 65 anos, tiña un tumor localizado na articulación que une o esternón co extremo esquerdo da clavícula. No seu lugar, o equipo médico implantoulle unha prótese de titanio feita a medida para que encaixase perfectamente na anatomía desta persoa.
A principal peculiaridade desta complexa operación é que a paciente recupera a mobilidade, como explicou a xefa de Cirurxía Torácica, Eva García Fontán. Este procedemento posibilita a rotación da peza xusto no lugar no que estaba situada a articulación afectada polo tumor, o que o converte en "excepcional".
Ademais da doutora García Fontán, participou na intervención o xefe de Cirurxía Vascular do Chuvi, José Manuel Encisa de Sá, ambos á fronte dun equipo de máis de dez profesionais de diferentes unidades. A operación realizouse no Hospital Álvaro Cunqueiro de Vigo, durou catro horas e a paciente, tras a súa convalecencia, xa foi dada de alta e deberá continuar a súa recuperación mediante fisioterapia respiratoria.
TUMOR E PRÓTESE
O tumor que afectaba a esta muller, un condrosarcoma grao I, xa fora extirpado parcialmente nunha intervención anterior, pero quedaban ramificacións e era necesaria unha resección máis ampla para evitar a súa reaparición.
Os profesionais do Chuvi valoraron entón a posibilidade de implantar unha prótese e, tras os primeiros estudos, realizouse un modelo con deseño en tres dimensións, baseado nas imaxes de alta definición obtidas no hospital. Ese modelo serviu de base para a fabricación da prótese de titanio, totalmente personalizada para a paciente.
Trátase dunha peza que substitúe a metade da clavícula, á parte esquerda do esternón, e ás tres primeiras costelas dese lado. A prótese foi deseñada de tal maneira que permite o movemento na unión da clavícula e o esternón, grazas a unha especie de esfera que rota sobre si mesma.
Escribe o teu comentario