Novo éxito dos billetes de AVE a 25 euros, que non duraron nin dúas horas na web da compañía

Renfe vendeu en menos de dúas horas os 25.339 billetes de AVE a 25 euros que lanzou na madrugada deste domingo no marco da iniciativa comercial coa que conmemora os 25 anos da posta en servizo da Alta Velocidade en España, segundo informou a compañía.

Trátase da sexta quenda de billetes a este prezo único que a operadora vén poñendo á venda o día 25 de cada mes, cos que os usuarios poden viaxar en todos os trens de Alta Velocidade-Longa Distancia entre o 1 de outubro e o 30 de novembro.

Segundo informou Renfe, nesta ocasión o volume de consultas na súa páxina web superou os 3,9 millóns de visitas ata o peche da promoción. Ás 1.45 horas completouse a venda de billetes e a web de Renfe volveu mostrar os prezos habituais de cada tren AVE.

Renfe lembrou aos seus clientes, a través da súa páxina web, que, a pesar de estar esgotada esta promoción puntual, mantén os billetes 'Promo', cos que a compañía ofrece descontos de ata o 70% sobre a tarifa flexible.

A compañía lanzou a venda de billetes AVE a 25 euros o pasado mes de abril, con ocasión da celebración dos 25 anos da posta en servizo da Alta Velocidade en España. A iniciativa supón vender unhas 25.000 prazas en trens AVE a 25 euros o día 25 de cada mes ata fin de ano.