A pesca é a maior preocupación común entre Reino Unido e Galicia polo 'Brexit'

Reino Unido quere manter os vínculos pesqueiros. 

O Reino Unido non quere recortar os vínculos económicos, neste caso pesqueiros, que mantén con rexións como Galicia, e esta actividade será "unha das prioridades máis importantes" na negociación do 'brexit', segundo afirmou este venres o ministro conselleiro da embaixada do Reino Unido en España, Tim Hemmings.

En declaracións aos medios, tras manter unha reunión coa conselleira do Mar, Hemmings quixo enviar "unha mensaxe de tranquilidade" con respecto ás consecuencias do 'brexit' na actividade das frotas pesqueiras. "Non sei como quedará a negociación, pero podo dicir que a pesca vai ser unha das prioridades máis importantes para nós", asegurou.

Nesa liña, o ministro conselleiro insistiu en que o Reino Unido "non quere recortar vínculos xa establecidos con rexións como Galicia". "Queremos un acordo o máis amplo posible", apostilou, e engadiu que o seu país "non ten ningún interese en que o comercio sexa máis complicado que agora".

Pola súa banda, a conselleira do Mar, Rosa Quintana, trasladou ao representante británico a posición de Galicia e os intereses do sector pesqueiro, así como o desexo de que "a pesca non sexa utilizada como moeda de cambio" no proceso negociador do 'brexit'.

"Eles tamén cren que o sector pesqueiro é moi importante e queren seguir mantendo as relacións", constatou a conselleira, quen reiterou que a Xunta traballará para que o negociador da Comisión Europea teña en conta a importancia estratéxica desta actividade.