Conseguen estabilizar o incendio de Barreiros que arrasa unhas 80 hectáreas, sobre todo de eucalipto

A Consellería de Medio Rural da Xunta de Galicia deu por estabilizado esta mañá o incendio en Barreiros que afectou principalmente á parroquia de Xusto de Cabarcos, en Vilamar, e que se estendeu a Celeiro de Mariñaos despois de iniciar pasadas as 16.00 horas da tarde deste domingo.
 

Segundo as estimacións provisionais, o lume arrasou un total de 80 hectáreas e obrigou a cortar nalgún momento a circulación da A-8 e da N-634, que foron abertas pouco despois, aínda que se recomenda precaución pola presenza dos equipos de emerxencia nas vías.

Así mesmo, houbo que desaloxar a varios veciños, que non chegaron á decena, pola proximidade das chamas, aínda que estas non alcanzaron as casas, polo que non houbo que lamentar perdas de construcións nin máis feridos depués do cinco brigadistas que foron evacuados ao Chuac en estado grave con queimaduras de segundo grao.

A alcaldesa de Barreiros, Ana Ermida, explicou que as persoas evacuadas durante a tarde "por precaución" volveron durmir a maioría ás vivendas. Ademais, durante a noite as brigadas continuaron traballando de forma continuada abrindo gabias para evitar a progresión do lume, que se estendeu con rapidez entre os numerosos eucaliptos da zona "ata que a chegada da choiva axudou a estabilizar a situación".
 

Para a súa extinción mobilizáronse 32 brigadas, 24 axentes e 4 técnicos en canto a efectivos, ademais de 28 motobombas, catro pas, 2 unidades técnicas de apoio, 7 helicópteros e 3 avións.
 

Desde o Concello de Barreiros manifestaron o seu agradecemento "ao inmenso labor dos brigadistas, persoal de extinción e demais efectivos que traballan arreo para controlar as chamas e por suposto, desexarlles unha pronta recuperación aos 5 birgadistas da unidade helitransportada de Castromaior que onte resultaron gravemente feridos".