Ultimato para que os Franco devolvan as estatuas do Mestre Mateo

Expediente que demostra a propiedade municipal.

O Concello de Santiago enviou este xoves un requirimento á familia Franco no que lle dá un prazo de 15 días para devolver ao patrimonio municipal as dúas figuras do Mestre Mateo que formaban parte da fachada que cubría o Pórtico da Gloria da Catedral compostelá e que están en mans da familia do ditador.

No requirimento especifícase que, en caso de non obter resposta no prazo dos próximos 15 días, a corporación "exercerá as accións legais procedentes" para recuperar estas dúas figuras.

As dúas esculturas románicas, imaxes de Abraham e Isaac do taller do Mestre Mateo, formaban parte da fachada que cubría o Pórtico da Gloria, de onde foron retiradas no século XVI e vendidas posteriormente ao concello compostelán polo Conde de Ximonde. Actualmente forman parte dunha exposición dedicada á obra do Mestre Mateo, aínda que figuran como propiedade da familia Franco.

EXPEDIENTE DE ADQUISICIÓN

Tras ter coñecemento deste feito, o Concello de Santiago recuperou do arquivo da Universidade de Santiago o expediente de adquisición que demostra a súa titularidade sobre as dúas esculturas románicas. Na propia escritura notarial especifícase a necesidade de "evitar que desaparezan do concello" e se preserve a súa propiedade "pública, dos veciños de Santiago".

A escritura confirma que as pezas foron adquiridas en 1948 polo Goberno local e inclúe unha cláusula na que o vendedor condiciona a súa adquisición a que as estatuas "permanezan indefinidamente en patrimonio do excelentísimo Concello de Santiago de Compostela", establecendo unha indemnización en caso de alleamento, doazón ou cesión de depósito.

VOLVEN AS VISITAS A MEIRÁS

Por outro lado, a Fundación Francisco Franco anunciou que este venres, día 22, volven as visitas ao Pazo de Meirás obrigadas pola súa consideración como Ben de Interese Cultural e que a entidade suspendeu o pasado 8 de setembro por "motivos de seguridade".

Este mércores, o BNG formalizou na sede da ONU en Xenebra (Suíza) a súa denuncia para que o organismo internacional actúe contra a "impunidade do franquismo" ao considerar que é "unha ofensa para todas as vítimas".

A líder do Bloque, Ana Pontón, e a portavoz da formación en Bruxelas, Ana Miranda, foron as encargadas de presentar o documento a través do que se reclama a devolución do Pazo de Meirás ao pobo galego, a ilegalización da Fundación Franco por "exaltación do franquismo", así como que se "facilite a investigación e a reparación dos crimes da ditadura".