O PP local da Coruña, ao xulgado por supostos chanchullos no seu congreso

Escribano denunciou que o congreso local non foi limpo.

O Xulgado de Primeira Instancia número 1 da Coruña citou o PP local da cidade herculina e o ex deputado autonómico Javier Escribano a unha audiencia previa, tras a demanda presentada por este último e outras persoas do seu equipo para optar á presidencia do partido na cidade, por supostas irregularidades no congreso local.

No seu escrito, ao que tivo acceso Europa Press, cítase ás partes a unha audiencia previa o próximo 28 de novembro no xulgado despois que Escribano e outros catro afiliados denunciasen que se incumpriron as garantías democráticas no congreso.

Entre outras cuestións, alegaron que se cambiaron os requisitos para concorrer como candidato a poucos días da celebración dun congreso no que resultou elixida a conselleira de Medio Ambiente, Beatriz Mato, como presidenta e para o que, finalmente, Escribano non presentou candidatura.

Agora, o xulgado convoca as partes a unha audiencia previa, antes da celebración do xuízo, "para tentar un acordo ou transacción entre as mesmas". Tamén será para propoñer e admitir proba ou examinar cuestións procesuais.

DEMANDA

Antes da celebración do congreso, en abril deste ano, a titular do Xulgado de Primeira Instancia número 13 da Coruña rexeitou adoptar a medida cautelar de suspensión do mesmo solicitada por Escribano

No auto, rexeitouse o seu argumento de que, a catro días do congreso, se solicitase que os afiliados con dereito a voto e a avalar tivesen que estar ao día das cotas. A xuíza cualificou de "sentido común" que sexa necesario "cumprir coas obrigacións estatutarias" cando se forma parte dunha asociación ou dun partido.