Alianza entre O Corte Inglés, Finsa e Ikea para crear o primeiro gran sistema de reciclaxe de mobles e colchóns

A empresa galega Finsa, con sede en Santiago de Compostela e case un século de historia na transformación da madeira, selou este luns en Madrid un acordo co Corte Inglés e IKEA para constituír unha asociación cuxo fin é pór en marcha un Sistema Colectivo de Responsabilidade Ampliada do Produtor (SCRAP) orientado a mobles, colchóns e aveños voluminosos en todo o territorio español.

O tres promotores chegan cos prazos xa vencidos. A Lei 7/2022 de residuos e solos contaminados para unha economía circular establecía que o Goberno debía desenvolver regulamentariamente a responsabilidade ampliada do produtor no sector do moble antes de finais de 2025, pero ese desenvolvemento normativo aínda non se produciu. As compañías fundadoras adiántanse así ao marco legal definitivo, que segue pendente de concreción por parte do Executivo central.

O problema de fondo é de gran magnitude. Europa xera 19 millóns de toneladas de residuos voluminosos como mobles e colchóns ao ano, dos que España é responsable de aproximadamente dous millóns. 

A maior parte destes residuos acaban en vertedoiros ou son depositados de forma irregular xunto aos colectores, unha imaxe que a nova asociación pretende erradicar mediante un sistema de recollida separada, trazable e coordinado.

UNHA EMPRESA GALEGA NO CORAZÓN DO ACORDO

Finsa participa na iniciativa a través de Evolta, a súa división especializada na recuperación e a reciclaxe de madeira. A compañía compostelá recuperou nun ano 500.000 toneladas de residuos de madeira no conxunto das súas fábricas, que inclúen plantas en Padrón, Santiago de Compostela, San Cibrao das Viñas e Rábade, o que sitúa a Galicia como un territorio estratéxico para o futuro tratamento destes residuos. O director de Evolta, Juan Carlos Moure, destacou que este SCRAP reforzará o ecosistema de recuperación xa existente en España e garantirá que a madeira regrese de forma sostible á cadea de valor do sector do moble.

Nos próximos meses, as tres empresas fundadoras definirán o modelo xurídico, financeiro e operativo do futuro sistema, coa porta aberta a que se adhiran outras compañías do sector. O obxectivo final é articular un espazo de colaboración que integre a todos os actores da cadea: fabricantes, distribuidores, xestores de residuos, consumidores e administracións públicas, entre elas a Xunta de Galicia.

A directora de Sustentabilidade de IKEA Ibérica, Eva Mengs, sinalou que canto maior sexa a participación empresarial, máis amplo será o impacto positivo desde o primeiro día de funcionamento. O responsable de Medio do Corte Inglés, Francisco Núñez, vinculou a iniciativa coa estratexia ambiental da empresa e o seu compromiso cunha xestión máis eficiente e responsable.

GALICIA E A Xunta, Á espera

Para constituír un SCRAP é necesario solicitar unha autorización ante o organismo autonómico competente en materia de residuos, o que converte á Xunta de Galicia nun actor crave do proceso, dado que Finsa opera principalmente en territorio galego. 

Con todo, a administración autonómica non se pronunciou sobre a constitución desta asociación no momento de publicar esta información. Tampouco o fixo o Ministerio para a Transición Ecolóxica, organismo competente para supervisar estes sistemas a nivel estatal.