Lugo estuda a instalación de bolardos nalgún "punto crítico" do San Froilán

Bolardos e macetas para evitar atropelos.

A próxima xunta local de seguridade de Lugo estudará a instalación de bolardos e outros elementos "disuasorios" durante as festas do San Froilán, que se celebrarán do 4 ao 12 de outubro.

Así o avanzou o subdelegado do Goberno, Ramón Carballo, quen sinalou que o obxectivo é centrar estes elementos naqueles puntos de maior concentración de persoas, aínda que non existe "ningunha sospeita" sobre posibles actuacións terroristas en Lugo.

"Iso ímolo estudar na xunta de seguridade", avanzou, incidindo en que se analizará a situación para ver se existe "algún punto crítico" que requira un reforzo, por exemplo "en zonas peonís".

REPOSICIÓN DE EFECTIVOS

Pola súa banda, o secretario en Galicia da Unión Federal de Policía, Miguel González, censurou que nin en Galicia nin en Lugo, en particular, está a repoñerse persoal nin cubrindo as vacantes policiais, cidade onde "custa moitísimo traballo atender a seguridade dos cidadáns" polas carencias de persoal

Finalmente, González reivindicou que se equipare "salarialmente" a policía e a garda civil coas policías autonómicas, apuntando diferenzas que superan os 600 euros.

"AS CIDADES SON DISTINTAS"

O alcalde de Vigo e presidente da Federación Española de Municipios e Provincias (FEMP), Abel Caballero, advertiu este martes de que "as cidades son distintas e non se poden dar normas xerais" en relación a medidas de seguridade antiterrorista.

Ao mesmo tempo, insistiu na necesidade de facer énfase no papel das xuntas locais de seguridade e na coordinación das policías locais co resto de forzas e corpos de seguridade.

DÉFICIT DE AXENTES

O cadro de persoal da Policía Local de Vigo é de pouco máis de 400 axentes, segundo figura na relación de postos de traballo (RTP), aínda que están en activo pouco máis de 320, segundo explicou o portavoz de SICO, o sindicato maioritario, Dámaso Pena.

Pena coincidiu co alcalde en sinalar a importancia de que se poidan convocar e cubrir todas as prazas, e advertiu de que a escaseza de recursos na policía local obriga os axentes a facer un sobresforzo, moitas veces á conta dos seus dereitos laborais.

Ademais, advertiu de que, coa entrada en vigor, a partir de xaneiro de 2018, da norma que permite aos axentes locais xubilarse aos 59 anos, a situación pode empeorar en Vigo. Así, hai case medio cento de policías locais na cidade olívica que poderían acollerse a esa medida voluntaria.