Tres detidos en Vigo en menos dun día por agresións machistas

Un deles fixo ademán de tirar ao baleiro a unha muller cando esta logrou pedir auxilio desde un balcón.


|

Violenciamachista 2


Axentes da Policía Local de Vigo detiveron como presunto autor dun delito de violencia de xénero e intento de agresión sexual a un veciño da cidade olívica de 49 anos de idade que supostamente insultou, deu unha puñada, tentou violar e fixo ademán de arroxar ao baleiro a unha muller.


Segundo informou a Policía Local, os feitos ocorreron sobre as seis e media da tarde deste domingo, cando a Central de Información e Mando recibiu un aviso de que se estaba producindo unha agresión dun home a unha muller na rúa Aragón.


No lugar, a requirente informou de que se atopaba na vía pública cando escoitou a unha muller pedindo auxilio desde un inmoble próximo, polo que os axentes acudiron ata o lugar e, guiándose dos ruídos, identificaron a vivenda.


Tras chamar, abriu a porta unha muller co pescozo arroibado e os ollos chorosos, quen dixo que só mantivera unha discusión. Un home que se atopaba xunto a ela introduciuse entón nunha das estancias, co que ela relatou "abertamente o ocorrido".


Así, manifestou que o home a insultara e tentara violala, ata que conseguiu zafarse e saír ao balcón para pedir auxilio. Entón, o home suxeitouna do pescozo facendo ademán de arroxala ao baleiro e, finalmente, propinoulle unha puñada no peito.


Ao escoitar esta versión dos feitos, o home volveuse moi agresivo e tratou de acometer contra a muller mentres a ameazaba para que non falase. Ante todo iso, os axentes procederon a deter ao home, de iniciais A.F.A., natural de Carballeda de Avia (Ourense) e domiciliado en Vigo.


DÚAS AGRESIÓNS DURANTE A MADRUGADA


Axentes da Policía Local de Vigo detiveron por senllos delitos de violencia de xénero a un home de 42 anos que arrastrou polo pelo a súa esposa ata o portal da vivenda e quitoulle o seu móbil e diñeiro; e a outro home de 22 anos que retivo e inmobilizou a súa ex parella e ameazou ao noivo actual dela.


Segundo informou a Policía Local, tras recibir unha alerta por supostos malos tratos, ás 2,50 horas deste luns unha unidade trasladouse ata a rúa Julia Minguillón, onde localizou a unha muller en roupa interior e chorando, quen manifestou que o seu marido a arrastrara do pelo ata o portal, e quitáralle á forza o teléfono móbil e 300 euros da súa carteira.


A muller facilitou as características do home, que foi localizado nas proximidades tombado nun banco público dunha zona axardinada; e acharon os 300 euros na súa carteira e o móbil nas proximidades "totalmente esnaquizado". Tras iso, procedeuse a deter ao home, R.A.A., natural de República Dominicana e domiciliado en Vigo.


Posteriormente, ás 8,10 horas, axentes acudiron a un edificio na rúa Esperanto, onde un home indicou que pouco antes estaba no piso coa súa noiva cando apareceu a ex parella dela proferindo ameazas e abalanzándose contra el, antes de coller un coitelo e ameazar con suicidarse. Ante isto, saíu correndo e decatouse de que o ex noivo collía á moza polos brazos e empuxábaa sobre a cama.


Os axentes acudiron entón ao domicilio e atoparon a muller chorando sentada na cama, quen explicou que quedara no portal coa súa ex parella para darlle unhas chaves pero el subiu ao piso e enfrontouse á sçia actual parella antes de retela e inmobilizala. Ante iso, procederon a deter o home, D.A.N., arxentino de 22 anos, que recoñeceu os feitos.

relacionada Duplícase o número de mulleres con algunha medida de protección por violencia machista
relacionada Aumentan un 16% as denuncias por violencia machista en Galicia

Sen comentarios

Escribe o teu comentario




He leído y acepto la política de privacidad

No está permitido verter comentarios contrarios a la ley o injuriantes. Nos reservamos el derecho a eliminar los comentarios que consideremos fuera de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Aviso legal Cookies Consello editorial Publicidade
Powered by Bigpress
CLABE