Leiceaga e Villoslada piden "xogo limpo" na carreira por liderar o PSdeG

O portavoz parlamentario do PSdeG, Xoaquín Fernández Leiceaga, asegurou que a posibilidade de chegar a un pacto entre os candidatos para liderar o partido "sería desvirtuar as primarias" e supoñería facerlle "un fraco favor" aos militantes socialistas.

Polo momento, o político de Noia comparte esta carreira co militante vigués Gonzalo Caballero e o seu compañeiro no grupo parlamentario Juan Díaz Villoslada, quen esta semana expresou o seu desexo de celebrar un debate electoral entre candidatos, unha posibilidade que Leiceaga ve con bos ollos.

"Pareceríame ben que a militancia puidese coñecer os distintos proxectos. Sempre sobre a base de algo moi importante, que é o xogo limpo que debe haber entre compañeiros dun mesmo partido", afirmou.

Cuestionado sobre un hipotético pacto entre candidatos previo á celebración das primarias, tamén Villoslada descartou posibles pactos entre candidatos: "Confío en que os tres que saímos agora saiamos coa perspectiva de chegar ata o final, non de chegar a acordos con máis antelación da prevista".

INTEGRACIÓN

Nunha entrevista, o deputado autonómico opinou que "outros precandidatos" a liderar o PSdeG están a empregar "unha dialéctica baleira de contido porque responde a situacións do pasado". Por iso, chama a que a carreira por liderar o partido en Galicia se desenvolva con "xogo limpo".

Por iso, emprazou a "non polarizar" a campaña das primarias para que "a partir" de outubro --mes das primarias e no que tamén se celebrará o congreso galego-- "todos" estean "detrás de quen sexa o novo secretario xeral".

A continuación, asegurou que "a integración" dos diferentes sectores do partido debe ser unha das claves de futuro do PSdeG, aínda que empraza a que "quen se integre" ha de facelo coa "convicción" de que o fai "nunha nova etapa de renovación" no seo socialista.

RETO: LIDERAR A ALTERNATIVA Ao PP

Para Leiceaga, o reto do PSdeG pasa por "liderar" unha alternativa política en Galicia ao PP en colaboración con outras forzas de esquerda, como En Marea e o BNG. E é que cre que para que esta alternativa "sexa maioritaria" debe estar encabezada polos socialistas, xa que ve o PSOE como a forza que maior capacidade ten para captar apoios.

Como reto máis próximo, Leiceaga fixou as eleccións municipais previstas para 2019, nas que o socialismo galego debe, ademais de "revalidar o poder municipal na provincia da Coruña", ser quen de recuperar apoios "nas contornas urbanas", así como "reconectar con colectivos sociais e mozos" que "ultimamente" lle deron "as costas" ao PSOE.