A Feira do Libro da Coruña abre as súas portas cun cento de actividades

A feira durará ata o día 10.

A 46 edición da Feira do Libro da Coruña abriu este martes as súas portas con máis dun cento de propostas para todos os públicos ata o próximo 10 de agosto. Como en anteriores edicións, os xardíns de Méndez Núñez acollerán este evento.

A apertura desta nova edición contou coa presenza, entre outros, do secretario xeral de Cultura, Anxo Lorenzo, quen asegurou que os xardíns de Méndez Núñez volven ser o escenario da "festa da palabra e da cultura".

Respecto diso, indicou que as feiras do libro de Galicia teñen na cidade herculina "unha cita de referencia grazas á excelente acollida que cada ano lle brindan os veciños e veciñas do municipio, así como as persoas que visitan A Coruña durante a celebración da feira".

Pola súa banda, para a presidenta da Federación de Librarías de Galicia, Pilar Rodríguez, este evento é "a feira das feiras" polo número de participantes e tamén de visitantes, ao redor dunhas 200.000 persoas en anteriores edicións.

PROPOSTAS

Nesta ocasión, está previsto que haxa máis de 60 firmas de autores, ademais de distintas propostas para todos os públicos como talleres, contacontos, exposicións, visitas guiadas ou espazos de debate.

En total, son case 40 casetas, das que 25 corresponden a librerías e o resto a editoriais e institucións, entre elas a Deputación da Coruña, cuxa vicepresidenta, Goretti Sanmartín, asistiu tamén á inauguración xunto a outros responsables institucionais como o concelleiro de Culturas, José Manuel Sande.

Este ano o programa contará coa participación dalgunhas das principais voces do panorama literario galego como Manuel Rivas, Ledicia Costas, Elena Gallego, Pedro Feijoo, Marilar Aleixandre e Andrea Maceiras, entre outros.