Vigo crea un circuíto urbano para a presentación do monopraza da Universidade

Presentación do UM17 en Vigo. Foto: UVigo

O terceiro monopraza creado por estudantes da Universidade de Vigo presentouse este luns no centro de Vigo, nun acto para o que se pechou un tramo da rúa para que o coche de carreiras puidese dar varias voltas e mostrarse á cidadanía.

26 estudantes das escolas de Enxeñería Industrial e Enxeñería de Minas e Enerxía da UVigo deseñaron e construíron o vehículo co que participarán en dúas probas da competición automobilística universitaria máis importante de Europa, a Formula Student.

O proxecto é froito da colaboración entre institucións públicas e privadas. Así, como lembrou o xefe do equipo UVigo Motorsport, Juan Villa, o apoio dos patrocinadores e a industria de ata 20 quilómetros, que lles proporcionou ata o 90% das pezas, fixeron posible sacar a relucir a formación que reciben na Universidade pública.

NOVIDADES NO COCHE

Como novidades do UM17 respecto dos seus dous antecesores están o motor, que agora procede dunha moto Kawasaki ER6-F, "máis robusto, potente e fiable", e melloras no chasis, que combina monocasco en fibra de carbono con aceiro tubular.

O obxectivo deste ano é mellorar a fiabilidade de edicións anteriores e "rematar a endurance, a proba máis dura, xa que o ano pasado en Montmeló ningún equipo español logrou completala".

O equipo está integrado por cinco mulleres e 21 homes, cinco persoas máis que o ano anterior. Ademais, conseguiron renovar a todos os patrocinadores e incorporar outros novos ata sumar 65.