As vítimas do Alvia apertan a Agustín Hernández, que non cede

O portavoz das vítimas reclamou que Hernández pida perdón.

Un portavoz da plataforma de vítimas do accidente do tren Alvia ocorrido en Angrois fai catro anos instou ao portavoz do PP de Santiago, Agustín Hernández, a pedir perdón e esixir a creación de "algo tan democrático" como unha comisión de investigación parlamentaria sobre o sinistro ferroviario.

Hernández, que era conselleiro de Infraestruturas, pediu hai semanas que o PP reflexionase acerca de apoiar unha comisión de investigación sobre o accidente, pero Feijóo respondeulle que cando un ocupa un cargo público debe seguir "os designios da cabeza" no canto de "o que che pide o corazón".

Arturo Domínguez, irmán do presidente da asociación, tomou a palabra ao comezo do pleno do Concello compostelán, onde leu unha intervención coa que advertiu de que aos afectados polo descarrilamento "ninguén" os "manipula".

Pola contra, subliñou que "hai xente honesta e boa" que os apoia nas súas reivindicacións de "verdade, xustiza e reparación", mentres que outras persoas "só defenden os seus intereses".

INICIATIVA DO BNG SOBRE 'ERTMS'

A participación da plataforma produciuse a raíz do debate dunha iniciativa do BNG coa que Goretti Sanmartín esixiu a posta en marcha do sistema de control da velocidade 'ERTMS' na totalidade da liña Ourense-Santiago, tamén na curva da Grandeira.

Ademais, os nacionalistas animaron a toda a corporación a secundar a manifestación que as vítimas teñen convocada este luns, 24 de xullo, polo cuarto aniversario. Esta invitación foi trasladada, igualmente, por Arturo Domínguez.

INTERVENCIÓN DA PLATAFORMA

Na súa quenda de palabra, Domínguez subliñou que esta traxedia era "evitable". Por iso, destacou que "é en comisión onde se deben depurar as posibles responsabilidades políticas", e solicitou --de novo en alusión velada aos populares-- que "non traten de enganarse" nin de enganalos "dicindo que hai un xuízo en marcha".

"No xulgado estableceranse as posibles responsabilidades penais, pero en ningún caso se depurarán as responsabilidades políticas", aseverou.

ALUSIÓNS A HERNÁNDEZ

Xa cara ao final, dirixiuse directamente a Hernández para lembrarlle que dixo que non se conte con el para "un uso político dun drama".

Trouxo a colación o primeiro aniversario, cando o Goberno cambiou o día das Medallas de Galicia e á entrada foron recibidos por "axentes antidisturbios".

Tamén lle sinalou os 39 concellos galegos nos que alcaldes do PP votaron a favor ou se abstiveron sobre a demanda da investigación, para preguntarlle se "están a usar os seus compañeiros do PP" o drama.

"Señor Hernández, se é realmente un demócrata e, como di, ten corazón, pídanos perdón e esixa publicamente algo tan lexítimo e democrático como a comisión de investigación", concluíu.

PRONUNCIAMENTO DO PP

Case tres horas despois, xa durante o debate do texto do Bloque, por parte do PP foi o propio Hernández o que argumentou a abstención do seu grupo á demanda de que o 'ERTMS' se instale nos últimos quilómetros do tramo.

Comezou contestando á plataforma que supón que "a súa dor" foi o que fixo que focalizase na súa persoa "palabras e sentimentos" dos que cre non ser "merecedor". Con todo, afirmou manter "todo" o seu respecto por Domínguez.

Así, chamando a "acabar coa utilización interesada e partidista dalgúns", e remarcando que non se refire nin a vítimas nin á súa asociación, avogou por esixir a posta en servizo do 'ERTMS' en toda a liña e por que o Consistorio "se sitúe en solidariedade" cos afectados "e coa determinación de que se depuren todas as responsabilidades, sen ningún tipo de condicionante".

Era esa a súa emenda, segundo explicou, que foi rexeitada polo grupo autor da proposta, que saíu adiante co voto favorable de Compostela Aberta, PSOE e BNG.

ALCALDE E PSOE

Despois disto interveu o rexedor, Martiño Noriega, quen tachou de "inaceptable" a posición do PP "a nivel de Estado" ao "impedir" a comisión de investigación, e advertiu de que "non se pasará páxina ata que se depuren responsabilidades".

Por parte do PSOE, Paco Reyes explicou o cambio de postura do seu partido sobre a investigación política por "cambios substanciais" nas "circunstancias" que rodean ao sinistro.