O pedrazo bota a perder 10.000 toneladas dos cultivos da Limia

Campo de patacas esnaquizado pola saraiba. //Foto: SLG

A meteoroloxía deste ano está a estragar multitude de colleitas en Galicia. Seca, xeadas na primavera e, agora, saraiba no verán.

As tormentas desta semana provocaron grandes desfeitas nos campos da comarca da Limia, o principal motor económico da zona. Os agricultores estiman que unhas 10.000 toneladas de pataca botáronse a perder nos últimos días.

Nun cuarto de hora, a saraiba 'alagou' a zona da desecada lagoa Antela, provocando danos no trigo, os chícharos, os repolos e as patacas.

As plantas mostran agora os golpes das pedras de xeo que acabaron con elas, provocando perdas millonarias, que aínda están por concretar.

Os concellos máis afectados son Xunqueira de Ambía e Vilar de Barrio. O primeiro deles xa acordou por unanimidade declarar zona catastrófica e o segundo prevé facelo a semana que vén.

Pola súa banda, o Sindicato Labrego Galego esixe axudas inmediatas para os agricultores afectados pola saraiba a través de liñas brandas de créditos e, no seu caso, de exencións da cotas da Seguridade Social e rebaixas nas cotizacións do IRPF.

Pola súa banda, o sindicato Unións Agrarias anunciou a ampliación do abanico de afectados que recolle a súa proposición non de lei de iniciativa popular, para a que se están recollendo firmas, de apoio nas zonas produtoras de viño e castaña para concretar axudas polas xeadas do pasado mes de abril.

Con esta modificación, o escrito, que xa conta co visto e prace da Mesa do Parlamento, pretende incluír aos produtores de pataca dos concellos de Xunqueira de Ambía e Vilar de Barrio que perderon toda a colleita coa saraiba das últimas horas. En total, cifran as perdas en 12.000 toneladas, é dicir, un 6 por cento do total da produción galega, tal e como precisou o sindicato agrario nun comunicado.