A central das Pontes alcanzou o 100% dos seus obxectivos ambientais de 2016

A central de ciclo combinado das Pontes alcanzou o 100% dos obxectivos ambientais que se marcou para o ano pasado, segundo informou a empresa nun comunicado.

A instalación de Endesa, tras a renovación da adhesión ao Rexistro de Sistemas de Xestión e Auditoría Ambiental EMAS, fai pública a Declaración Ambiental de 2016, un proceso que se realiza seguindo normas internacionais e baixo o control de AENOR.

No pasado exercicio, o ciclo combinado logrou a súa mellor produción do últimos seis anos, con 498.987 megawatts hora. A empresa resalta que "máis importante que a cantidade de enerxía eléctrica xerada son as condicións nas que a planta opera", posto que "é esencial para actuar como respaldo da eólica, porque a súa capacidade para entrar en produción nun prazo moi curto de tempo evita que o sistema se colapse polo carácter inestable e case impredicible dos parques".

Polo que atinxe ao consumo do gas natural que emprega como combustible, durante o 2016 alcanzou un rendemento medio anual do 51%, superior ao de anos anteriores, motivado fundamentalmente por un funcionamento a unhas cargas medias máis elevadas e á implementación de melloras destinadas ao incremento da eficiencia.

A dirección da central de ciclo combinado xa estableceu novos retos para este ano, entre os que destaca reducir nun 15% o tempo de arranque, gañar máis eficiencia na xestión de residuos e mellorar a impermeabilización dos cubetos de planta.