Rodríguez, sobre o peche de escolas: "Todo está baseado nunha gran mentira"

|

Pechecoles


"Todo está baseado nunha gran mentira". Así de contundente se amosou o conselleiro de Cultura, Educación e Ordenación Universitaria, Román Rodríguez, tras as críticas da comunidade educativa, familias e profesorado pola "reorganización" anunciada pola Xunta para o próximo curso e que levaría a o peche de instalacións nas Pontes e en Outes, en concreto o CPI Monte Caxado e o CEIP Emilio Navasqüés.


Rodríguez defendeu que, co plan do seu departamento, "mantéñense o 100% das aulas" a través de fusións de centros e traslado de unidades de secundaria a outros institutos, asegurando que repercutirá ademais nunha "mellora" das condicións dos alumnos con "máis servizos e máis oportunidades formativas".


Educación integrará o alumnado de infantil e primaria do CPI Monte Caxado, que se extingue, no complexo do CEIP A Magdalena, pasando o alumnado de ESO ao IES Moncho Valcarcel, defendendo que non supoñerá ningún cambio para o desprazamento de alumnos e que se manteñen as seis unidades de infantil e as 12 de primaria que xa existían, ademais de respectar a cociente de alumnos.


En Outes, fusiónase o Emilio Navasqüés (que desaparece) co Plurilingüe Serra de Outes, creando un novo complexo no que se destinarán uns 540.000 euros e mantendo 18 unidades de primaria e infantil.


O conselleiro apostou, neste sentido, por avanzar máis aló do modelo de CPI, creado "no seu momento en zonas rurais con dificultades de enviar a mozos aos institutos", dado que na actualidade "o lóxico e normal" é que os alumnos de primaria e de secundaria estuden con outros da súa mesma etapa, que é "o que se propón" con esta organización.


"Non se pechan, en ningún caso, catro centros" e "nin unha soa das unidades educativas", insistiu, sinalando que das citadas fusións sairán aulas "por baixo da cociente permitida" e "buscando incrementar os servizos educativos".


Neste sentido, manifestou "entender ás familias" ante uns cambios que poden xerar "incerteza" ou "algún medo", poñéndose "a disposición dos centros" para informar "de todas as dúbidas que xurdan", pero desde a base de expor un sistema "que funcione".


"Garanto que en setembro -o curso- comezará sen ningún tipo de problema nestes centros que algúns din que van pechar", ironizou Rodríguez, quen advertiu de que "o tempo dará e quitará razóns".


Tamén sinalou que o profesorado se manterá, aínda que recoñeceu que "haberá axustes básicos de persoal", horarios e servizos complementarios que se analizarán "en cada caso". A pesar diso, destacou que estas fusións permitirán a estes centros resultantes unha "maior posibilidade" de acceso a programas de innovación educativa.


PETICIÓN "DESPROPORCIONADA"


Rodríguez tamén lamentou a petición "absolutamente desproporcionada" de dimisión formalizada por En Marea, reiterando que está "baseada nunha gran mentira de que se pechan catro centros" e insistindo en que "nuns casos trasládanse alumnos dun centro para outro e noutros fusiónanse aulas".


Así mesmo, esgrimiu o "notable éxito" do curso que termina, destacando a "normalidade" e os resultados "importantísimos" alcanzados en "mellora da calidade e equidade".

relacionada Educación bota o peche a varios centros o próximo curso "sen previo aviso"
relacionada En Marea esixe a dimisión do conselleiro de Educación polo peche de colexios

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Aviso legal Cookies Consello editorial Publicidade
Powered by Bigpress