Vence critica o "corsé" que supón a UPG para o BNG e valora o papel de Pontón

Avisa de que En Marea ten "o mesmo problema", sinala a Podemos e EU e descarta "volver a primeira liña" da política galega. 


|

Xabiervence


O ex portavoz nacional do BNG, Xavier Vence, criticou este xoves o "corsé" que supón a UPG para o Bloque, xa que considera que "as posicións ideolóxicas e organizativas que controlan o desenvolvemento" da formación frontista "fan difícil facela atractiva".


Nunha entrevista coa Radio Galega, Vence asegura que o BNG "necesitaba unha refundación de discurso e unha estrutura que permitise realmente integrar xente nova", pero di que chegou "á conclusión" de que co "corsé" da UPG "era un proxecto que non tiña o percorrido que necesitaba o país".


Respecto diso, defende que se necesita "un nacionalismo maioritario que represente á maioría da sociedade para ser alternativa de país", no canto de estar "condenados a ser minoritarios e ser relativamente marxinais".


"En Galicia é difícil construír unha maioría social ao redor dun partido comunista galego. Non creo que deban demonizarse os valores dos partidos comunistas, pero ao redor desa estrutura e dese proxecto é díficil chegar a unha maioría social", reflexiona.


"En Galicia é difícil construír unha maioría social ao redor dun partido comunista galego"

Con todo, valora que a actual líder do BNG, Ana Pontón, ten "experiencia e táboas", pero "nin o problema son as persoas nin tampouco os salvadores dun proxecto, senón que o problema está na configuración do proxecto en si, de lograr que conecte coa xente".


"MESMO PROBLEMA" EN MAREA


Sobre En Marea, Vence cre que podería ter futuro se logra madurar un proxecto político soberano en Galicia capaz de sumar sensibilidades nacionalistas e non nacionalistas. Advirte de que os partidos que a conforman poden facer perigar e sinala a Podemos e a Esquerda Unida.


"O modelo co que se configurou o BNG, cunha estrutura de partidos dentro moi disciplinados, acaba sendo un corpiño para o crecemento, e ese é o mesmo problema de En Marea, pode ocorrer que a lóxica dos partidos internos se impoña, a lóxica de Podemos e EU", avisa.


DESCARTA VOLVER A PRIMEIRA LIÑA


Así mesmo, Vence descártase para volver á primeira liña política. "Xa cumprín", deixa claro. Ademais, nega que lle fixesen propostas para participar no proxecto de En Marea, aínda que admite que "puido haber mensaxes indirectos".


"Eu xa fixen o meu papel, a miña contribución ao proxecto nacionalista e teño que recoñecer que non o conseguín, e neste sentido cumprín o meu papel", asevera. "Estarei á beira dos que camiñen nesa dirección, son precisas moitas mans para facer un proxecto político de fondo e maioritario para o país, pero sen estar na primeira liña", conclúe.

relacionada Xavier Vence solicita a baixa do BNG

Sen comentarios

Escribe o teu comentario




He leído y acepto la política de privacidad

No está permitido verter comentarios contrarios a la ley o injuriantes. Nos reservamos el derecho a eliminar los comentarios que consideremos fuera de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Aviso legal - Política de Cookies - Política de Privacidade - Configuración de cookies - Consello editorial - Publicidade
Powered by Bigpress
CLABE