Lugo é a provincia española con mellores perspectivas laborais para a campaña de verán

Lugo preséntase como a provincia española con mellores perspectivas laborais para a campaña de verán, con un 24,8 por cento de incremento, seguida por Burgos (18,1%), Teruel e Zamora (16,9%).

No lado oposto, segundo Randstad, tan só seis provincias aumentarán por baixo dos dous díxitos. Cabe destacar, neste punto, a presenza de catro provincias castelán-manchegas, como Albacete, Toledo, Cidade Real e Conca. Zaragoza e Cádiz completan esta listaxe.

A nivel nacional, as previsións de Randstad apuntan á xeración de case 550.000 contratos, o que tamén supón a mellor cifra da historia para unha campaña de verán. Esta cifra reflicte un aumento do 12,2 por cento respecto de 2016, cando se asinaron 488.853 contratos, e acumula un crecemento do 72,3 por cento desde 2010.

Os sectores que xeran máis oportunidades laborais nesta época son comercio, transporte, hostalería e lecer e entretemento, principalmente debido ao incremento de turismo tanto nacional como internacional. Neste sentido, a estacionalidade deste período motiva que a contratación temporal sexa unha das opcións máis utilizadas polas empresas para adaptarse ao incremento da demanda e cubrir vacacións.

En termos absolutos, Andalucía é a comunidade autónoma que máis contratacións rexistra, con máis de 112.000. Catalunya e Comunitat Valenciana completan o podio, con 77.900 e 58.760, respectivamente, mentres que Madrid alcanza a cuarta praza con 57.000 contratos. Estas catro rexións acumulan máis do 55 por cento do total de incorporacións que se realizarán a nivel nacional.