Fomento insiste en que as datas do AVE son as definitivas

O Ministerio de Fomento sostén que "blindou" no seu Orzamento de 2017 o investimento necesario para terminar de construír as distintas liñas ferroviarias de Alta Velocidade actualmente en execución nos prazos comprometidos coas comunidades autónomas, segundo asegurou o titular do Departamento, Íñigo de la Serna.

"Os principais corredores contan con financiamento, teñen garantido o investimento suficiente para o ano 2017 e seguintes para cumprir cos prazos establecidos e comprometidos cos distintos territorios", asegurou o ministro durante o debate en pleno dos Orzamentos no Congreso.

Desta forma referiuse á conclusión do AVE a Galicia, a 'Y' vasca, o Corredor Mediterráneo ou o AVE a Estremadura, entre outras infraestruturas ferroviarias.

O Orzamento de Fomento para 2017 destinará 4.471 millóns de euros para o ferrocarril, que acapara así a metade (o 49,6%) do monto investidor total.

De la Serna ratificou na Cámara Baixa a súa "aposta prioritaria" por "completar a rede actualmente en execución", aínda que recoñeceu para iso foi previamente necesario "realizar unha nova planificación para adaptar os proxectos e poñer en valor o esforzo xa realizado nos distintos corredores e garantir a viabilidade das liñas".

O ministro referíase así aos máis de sesenta contratos ferroviarios que estaban paralizados á súa chegada ao Ministerio por presentar distintos problemas técnicos e económicos, que se foron liquidando nos últimos meses.

RECURSO AO INVESTIMENTO PRIVADO

Segundo De la Serna, Fomento, que acumula varios exercicios de descenso de promoción de obras, conta para 2017 cun Orzamento con "clara vocación investidora" dados os case 9.000 millóns de euros que presentan para investimentos. Con todo, recoñeceu que é unha cantidade que "tentará complementar con investimento privado".

O ministro detallou os proxectos que se acometerán en virtude das distintas emendas pactadas durante a tramitación dos Orzamentos no Congreso.