O Sergas desmantela un centro de saúde de Forcarei por aforrar 50.000 euros

Case un cento de veciños de Forcarei acudiron este luns ao Pazo Provincial para asistir ao pleno da Deputación de Pontevedra, no que interviñeron ao comezo da sesión para esixir o mantemento dos traballadores que actualmente prestan servizo no centro de saúde de Soutelo de Montes, unha decisión que tachan de "sensentido" e "atropelo".

Unha portavoz da Plataforma de defensa do Centro de Saúde de Soutelo lamentou o "desmantelamento do centro de saúde por parte do Sergas", que cualificou de "inxustiza e agravio para quen vive no rural".

Así, instou á Administración provincial a que a asignación de médicos atenda a criterios como a dispersión xeográfica ou o envellecemento da poboación.

Tamén criticou o trato dispensado pola alcaldesa de Forcarei, Belén Cachafeiro, membro do grupo provincial do PP na Deputación, á que acusaron de tentar deslexitimalos. "Sentímonos sós e enganados polo noso concello", subliñan.

"O Sergas di que vai ter un aforro de máis de 50.000 euros, é iso o que valemos os veciños?", pregunta a Plataforma.