España descarta elevar a alerta antiterrorista ao nivel máximo

O ministro do Interior, Juan Ignacio Zoido, anunciou este xoves que a mesa de valoración da ameaza terrorista decidiu manter o nivel 4 de alerta aínda que redobrando a vixilancia ata a finalización dos eventos de gran afluencia de público.

Zoido mandou á cidadanía unha mensaxe de "tranquilidade dentro da preocupación" propia do nivel de alerta decretado o 22 de xuño de 2015, despois do atentado cometido o pasado luns por un terrorista suicida en Manchester, deixando 22 mortos e 56 feridos.

A principal medida adoptada foi trasladar ás unidades das forzas de seguridade que manteñan a "vixilancia, control e tensión durante toda a evolución de eventos de gran afluencia de público ata a súa finalización e abandono dos asistentes do lugar de celebración e as zonas adxacentes".

O ministro dixo que aínda falta recibir información dos servizos de intelixencia, mantendo o contacto coas autoridades británicas. A súa intención, dixo, é informar a todos os grupos aínda que "non considera necesario" convocar o pacto antiterrorista. "Non foi considerado oportuno por parte dos expertos", indicou.

IMPLICACIÓN INTERNACIONAL

Esta colaboración entre países revélase como fundamental para a loita contra o terrorismo. Salman Abedi, o terrorista suicida do atentado perpetrado este luns en Manchester, estivo na cidade alemá de Düsseldorf catro días antes de que se producise o ataque, segundo información dos servizos de Intelixencia Alemáns que revelou este xoves o diario berlinés 'Der Tagesspiegel'.

Fontes de seguridade alemás explicaron que Abedi chegou a Düsseldorf procedente de Libia a través da República Checa e que o 18 de maio, catro días antes do ataque terrorista, colleu un voo rumbo a Manchester. Descoñécese canto tempo estivo en Alemaña, de acordo coas mesmas fontes.

Os servizos de seguridade alemáns investigan agora se Abedi estaba vinculado a algún grupo local. No último ano, Alemaña foi escenario de varios atentados. O máis grave tivo lugar o pasado 19 de decembro, cando Anis Amri empotrou un camión contra en mercado do Nadal de Berlín e matou doce persoas.

OITO DETIDOS NO REINO UNIDO

De momento, hai oito detidos no Reino Unido, aos cales se suman o pai e o irmán de Abedi, que foron arrestados en Trípoli. A familia Abedi é de orixe libia pero emigrou ao Reino Unido fuxindo do réxime de Moammar aal-Gaddafi. O kamikaze naceu territorio británico, sen que aínda estean claros os detalles da súa posible radicalización.

As autoridades británicas cren que Abedi non actuou só, senón que contou co apoio dunha "rede". A organización terrorista Estado Islámico reivindicou a autoría do atentado, pero o pai de Abedi asegurou nunha entrevista con Reuters que non pertencía a ningún grupo.

Esta información coñécese en plena crise entre Londres e Washington polas filtracións sobre a investigación do atentado de Manchester que se fixeron desde os Estados Unidos e que levaron á Policía británica a cesar o intercambio de datos. A primeira ministra, Theresa May, queixarase ao presidente norteamericano, Donald Trump, por este asunto na reunión que manterán este xoves en Bruxelas durante o cume da OTAN.