Denuncian ante Inspección de Traballo á empresa de Vilalba na que morreu un mozo de 24 anos en prácticas

O tráxico accidente ocorreu nunha nave situada no polígono industrial Sete Pontes de Vilalba, no municipio lucense, onde Xoel realizaba as súas prácticas nunha empresa dedicada ao deseño e fabricación de maquinaria industrial. Un tubo de aproximadamente 500 quilos caeu sobre o mozo, que quedou atrapado baixo a pesada peza. Os servizos de emerxencia mobilizados —061, Garda Civil, Policía Local, Protección Civil e bombeiros— só puideron certificar o seu falecemento no lugar. 

A #CIG interpuxo agora unha denuncia formal ante a Inspección de Traballo de Lugo e anunciou que se acudirá como acusación particular na causa xudicial xa aberta, esixindo que se investiguen os feitos e depúrense as responsabilidades correspondentes. 

INDICIOS DE NEGLIXENCIA NA EMPRESA

O sindicato apunta a dous grandes fallos. Por unha banda, considera que existen indicios claros de que a empresa non respectaba a normativa de prevención de riscos laborais, ao non garantir a protección eficaz do operario nin a súa integridade física. Por outro, denuncia que non está acreditado que o mozo recibise a formación teórica e práctica requirida sobre os riscos específicos do seu posto de traballo. 

A CIG vai máis lonxe e sinala que a empresa carecía dun procedemento de traballo en elevación ou, se existía, non se aplicou: de habelo feito, a zona de perigo baixo a carga suspendida habería estado perimetrada e ningún traballador podería permanecer na traxectoria de caída. Ademais, sostén que a operación debería estar dirixida por un recurso preventivo. 

A Xunta tamén queda no punto de mira. O convenio de colaboración asinado entre a administración autonómica e a empresa establece que o alumnado debe superar a formación en prevención antes de comezar as prácticas, pero a CIG considera que, atendendo ao plan de estudos do ciclo, o mozo non contaba coa preparación específica para os riscos reais que atopou: traballar con pezas de 500 quilos.

A FP DUAL NO BANCO

As tarefas que desempeñaba Xoel no momento do accidente —de alto risco e gran carga física— non se correspondían, segundo a CIG, coas funcións recollidas no seu plan de formación. A propia avaliación de riscos da empresa nin sequera contemplaba a posibilidade de que un alumno en prácticas realizase actividades dese perigo. 

Para o sindicato, a morte do mozo pontés é a mostra máis grave dun modelo formativo que, ao seu xuízo, antepón os intereses empresariais á seguridade: no seu comunicado cualifica a actual concepción da #FP dual como unha vía para reducir a calidade educativa, avanzar na privatización do ensino e prover ás empresas de man de obra barata sen garantir os dereitos básicos do alumnado.