Mercosur: caída de prezos en carne galega e veto ao vacún brasileiro

O acordo comercial entre a Unión Europea e o Mercosur leva apenas tres semanas en aplicación provisional —entrou en vigor o pasado 1 de maio— e xa xera lecturas contrapostas no sector agrario galego. Unións Agrarias (UU.AA.) e a Asociación Agraria de Galicia (Asaga) recoñecen que é "pronto" para sacar conclusións, pero destacan que a recente decisión de Bruxelas de suspender desde o 3 de setembro as importacións de carne de vacún de Brasil —por non ofrecer garantías suficientes sobre o uso de antimicrobianos e sustancias prohibidas como o estradiol— demostra que os mecanismos de control funcionan. 

Fronte a esa lectura optimista, o Sindicato Labrego Galego (#SLG) mantén a súa oposición ao tratado e rexeita que as cláusulas de salvagarda sexan suficientes para protexer ao sector. A organización reclama á Xunta e ao Goberno central que insten á Comisión Europea a abrir unha investigación formal ante o que describe como unha baixada de prezos que xa se estaría producindo no vacún de carne galego, cun impacto especialmente acusado na carne amparada pola IXP Vaca e Boi de Galicia.

O Observatorio de Prezos, na recta final
O secretario xeral de UU.AA., Roberto García, recoñece que polo momento non hai "novidades relevantes" sobre o impacto real do acordo nos sectores produtores galegos, aínda que advirte de que "existe moita cautela" á hora de avaliar posibles efectos. O sector cárnico e o lácteo concentran a maior atención, dado o seu peso na economía rural galega. Asaga, pola súa banda, móstrase satisfeita coa actuación europea fronte a Brasil, aínda que tamén apela á prudencia. Galiciae

A Xunta de Galicia, que en febreiro asinou con UU.AA. e Asaga unha declaración conxunta con esixencias fronte a Mercosur, asegura que o Observatorio de Prezos —un dos compromisos daquel acordo— está "na recta final". A Consellería de Medio Rural indica ademais que xa trasladou formalmente ao Goberno central as peticións recollidas naquela declaración, aínda que recoñece descoñecer "os pasos que se están dando" desde o Ministerio de Agricultura.

Unha brecha que se abre
O campo galego, especialmente o gandeiro, observa con preocupación un escenario de maior competencia exterior nun momento xa marcado pola perda de explotacións e a presión sobre os prezos. O SLG alerta de que as salvagardas europeas non bastan para conter esa deterioración, mentres UU.AA. confía en que o seguimento conxunto a través de UPA —tanto en Galicia como no resto do Estado— permitirá detectar calquera irregularidade e elevala a Bruxelas con documentación técnica. O Ministerio de Agricultura non se pronunciou sobre a situación específica do sector galego.