"Un condenado por maltratador machista non pode ter a custodia dos fillos"

Alberto Núñez Feijóo ratificou este xoves que avala "cambiar e adecuar" a lexislación vixente, de forma que se endureza o control sobre a relación cos seus fillos dos maltratadores. "Unha persoa condenada por maltratador machista non pode manter a custodia dos seus fillos", sentenciou.

Na rolda de prensa posterior ao Consello da Xunta, o presidente lembrou o dobre parricidio de Moraña e tamén o caso do neno achado en Oza-Cesuras, por cuxa morte foi detido seu pai.

Feijóo trasladou o "pésame e o afecto" de todos os galegos á súa nai, pero recoñeceu que "nada serve" para a nai, non se poderá "reparar a súa vida".

Agora, apelou a esperar a que se "complete" a investigación e pediu que "todo o peso da lei caia sobre o autor", xa que a "sentenza" é "a única" que pode concretar o ocorrido "xudicial e probatoriamente".

Ao tempo, lembrou que a Conferencia de Presidentes decidiu fiar un novo Pacto de Estado sobre a violencia machista e recalcou que hai "unha postura común" entre os grupos  no Parlamento, que tamén trasladará a Xunta.

NAIS E FILLOS, VÍTIMAS

Dido isto, recoñeceu que "hai que cambiar e adecuar a lexislación" á situación "real" que "lamentablemente se vive no mundo". "Pensamos que se deben considerar vítimas de violencia machista as nais dos nenos asasinados polos pais; sen dúbida", recalcou o presidente.

Tamén apoiou que se prive da patria potestade nos casos de asasinato machista. "Pensamos que hai que suspender o réxime de visitas para os pais maltratadores e que hai que prohibir a atribución ao agresor condenado por violencia machista da garda e custodia compartida ou exclusiva dos seus fillos", recalcou.

"Unha persoa que maltrata á nai non pode ter a patria potestade dos fillos. Parécenos que, cando unha persoa por sentenza, está condenada por maltratador machista, non pode manter a custodia dos seus fillos. Iso é o que pensamos", resolveu.