O novo fenómeno do fado portugués presentará o seu disco no Auditorio de Galicia
António Zambujo colocouse no primeiro posto do top portugués de vendas co último álbum.
António Zambujo, o novo fenómeno do fado portugués, ofrece un concerto no Auditorio de Galicia o vindeiro domingo 14 de maio. As entradas poden comprarse de maneira anticipada en Ticketea ao prezo de 20 euros.
En só dúas semanas, António Zambujo conquistou o Disco de Ouro co seu novo álbum, 'Ate Pensei Que Fosse Minha', e á semana seguinte xa conseguiu o primeiro posto do top portugués de vendas, tanto en formato físico como dixital, segundo indicou a organización nun comunicado.
'Ate Pensei Que Fosse Minha" é un proxecto moi especial na carreira de António Zambujo, sendo composto soamente por cancións de Chico Buarque, mestre da música popular brasileira, que chega mesmo a colaborar co músico portugués na canción 'Joana Francesa'.
Para este disco, António Zambujo contou tamén coa colaboración da cantora brasileira Roberta Sá, no tema 'Sem Fantasia', e da fadista Carminho, en 'O Meu Amor'.
Escribe o teu comentario