Denuncian que a Xunta "exclúe" dos seus campamentos a menores con discapacidade

A asociación Pétalos, de axuda a persoas que padecen trastornos de apego, denunciou que a Xunta de Galicia "discrimina a menores con trastornos de conduta excluíndoos dos seus campamentos de verán".

Segundo indicou a entidade, o artigo 3,3 da Orde da Consellería de Política Social que convoca as prazas para os campamentos de verán deste ano recolle que, para ser admitido, "será necesario non padecer trastorno de conduta e/ou de comportamento que dificulte a convivencia".

Para a entidade, esta "exclusión con carácter xeral" e "sen limitación ou condición ou excepcións algunhas", exclúe "a posibilidade de participar nos referidos campamentos a calquera mozo que padeza trastorno de conduta ou comportamento que dificulte a convivencia".

Petalos pediu a nulidade desta norma "por considerala discriminatoria e estigmatizante e atentar contra os dereitos á inclusión das persoas con discapacidade" e denunciou esta situación ao Defensor do Pobo e ao Valedor do Pobo.