Un ourensán dedicábase a alugar a través de internet vivendas pantasma en Eivissa

Axentes da Policía Nacional detiveorn en Ourense un home que alugaba vivendas de Eivissa que non existían a través de coñecidas páxinas da internet. Aproveitaba a alta demanda de aloxamentos na illa para enganar ás súas vítimas con fotografías de casas reais.

Segundo informa a dirección xeral de Policía nun comunicado, a investigación iniciouse cando os axentes recibiron información sobre unha estafa inmobiliaria mediante a que se ofertaban vivendas supostamente en Eivissa, pero que en realidade non existían.

Estes anuncios estaban ben elaborados, con fotografías de casas reais de Eivissa e datos específicos das mesmas, acompañados do contacto da persoa que supostamente os xestionaba.

Así, cando o arrestado conseguía atraer a atención dalgún interesado nos supostos alugueres, daba maior credibilidade á transacción falsificando todo tipo de documentación como facturas de luz e impostos. Desta forma conseguía que as súas vítimas cresen que era propietario das vivendas ofertadas.

Finalmente, facíase coas cantidades estafadas por transferencias e outros medios de envío de diñeiro por correo ou mesmo a súa entrega en man.

Obtido o seu obxectivo, deixaba de contestar o teléfono cando as vítimas, tras decatarse da estafa e unha vez que se atopaban xa en Eivissa, trataban de poñerse en contacto con el para reclamar o diñeiro adiantado. Cando conseguían falar co estafador, recibían ameazas por parte deste.

A detención realizouse en Ourense, así como un rexistro no seu domicilio no que se incautou numerosa documentación relacionada coa súa actividade delitiva.