Caballero pide que os Concellos poidan reinvestir o seu superávit entre 2017 e 2018

O alcalde de Vigo e presidente da Federación Española de Municipios e Provincias (FEMP), Abel Caballero, expresou este martes o seu rexeitamento ao documento de orzamentos do Estado, que impide ás entidades locais reinvestir o seu superávit, e reclamou ao Goberno que se permita ese investimento entre 2017 e 2018, dado que "non dá tempo" a realizala no actual exercicio.

En declaracións aos medios, o rexedor olívico sinalou que "os orzamentos xerais, se se aproban, aprobaranse en xuño" e aínda no caso de que se introducisen cambios para permitir a reinversión do superávit (uns 18 millóns de euros no caso do Concello de Vigo) non daría tempo a realizar as oportunas tramitacións administrativas.

"Acabarase o ano e non poderemos executar o superávit, e o ministro Montoro sábeo", aseverou Caballero, quen advertiu de que as entidades locais "xa non están para ser os pagáns, mentres outras institucións non cumpren" para alcanzar os obxectivos de déficit impostos pola UE.

"Ata aquí chegamos", proclamou o alcalde socialista, quen lembrou que se reunirá este mércores coa Federación de Municipios de Cataluña e que o xoves haberá xunta de goberno extraordinaria da FEMP para "urxir" ao Executivo a modificar a redacción da lei dos orzamentos e permitir a reinversión do superávit do ano pasado entre 2017 e 2018, "e que se compute en 2017".

SUBVENCIÓNS A RUTAS

Noutra orde de cousas, o Grupo Municipal do PP no Concello de Vigo denunciou este martes que o goberno local mantivo o prezo do concurso de promoción turística (subvención a voo) para as liñas de Valencia, Eivissa e Mallorca, a pesar de que se reduciron as prazas.

Así, segundo lembrou Diego Gago, o concurso foi convocado inicialmente a finais do ano pasado pero quedou deserto. Naquel momento o prezo de licitación era de 736.000 euros e o prazo de execución era de 37 meses; a subvención repartíase en catro anualidades (37.000 euros en 2016, 233.000 euros en 2017, 233.000 euros en 2018 e 233.000 euros en 2019).

Ao quedar deserto o concurso, o goberno local convocou un novo, cuxas bases foron aprobadas o pasado mes de marzo. Neste caso, o prazo de execución é de 32 meses e o custo é o mesmo (repartido en tres anualidades, de 2017 a 2019).

Con todo, segundo apuntou o PP, redúcense algunhas das accións promocionais vinculadas ao contrato, e tamén se diminúe o número mínimo de semanas de operación, así como as prazas (as mínimas esixidas pasan das 10.000 que sumaban os voos no primeiro concurso ás 4.500 que se requiren agora como mínimo).

Diego Gago, quen pediu investir en promocionar Peinador "pero con cabeza", sinalou que, con eses cambios, e ao manter o prezo de licitación, a subvención pública deses voos pasaría de 63 euros a 163 euros por plaza.