Detidas seis persoas e desmantelado un punto de venda de drogas en Santiago

A Policía Nacional vén de deter a seis persoas no marco dunha operación denominada 'Copas rotas', iniciada a finais do pasado ano, na que desmantelou un punto de venda de drogas en Santiago de Compostela.

Segundo informou a Policía Nacional, grazas á colaboración veciñal púidose comprobar un aumento na afluencia de toxicómanos na zona de Belvís, na capital galega, "motivado pola posible existencia dun punto de venda de sustancias estupefacientes".

Como consecuencia dunha investigación, os axentes lograron identificar e deter unha parella de 44 e 56 anos como responsables de distribuír heroína entre os toxicómanos que acudían á zona, establecendo para iso como "base de operacións un domicilio radicado nas inmediacións do parque da Trisca", segundo indicaron as mesmas fontes.

Unha vez identificados os distribuidores da heroína en Santiago, a investigación centrouse en localizar a orixe da devandita sustancia, o que levou as pescudas dos investigadores á localidade coruñesa de Boiro, onde se atoparon cun "vello coñecido", segundo destacou a Policía, por ser detido anos atrás por tráfico de drogas.

En concreto, segundo indican as mesmas fontes policiais, trátase de un home de 42 anos encargado xunto con outro home de 43 de abastecer de sustancia estupefaciente aos detidos en Santiago de Compostela.

COLABORADORES

Tras proceder á súa detención, o labor dos axentes determinou a existencia de posibles "colaboradores a pequena escala" dos detidos en Santiago. Así, a investigación deu como resultado a detención doutras dúas persoas que abarcaban outras zonas da cidade.

As detencións foron practicadas por funcionarios adscritos ao Grupo de Estupefacientes de Brigada Local de Policía Xudicial da Comisaría de Santiago de Compostela.

Entre o material intervido atópanse unhas mil dose de heroína, básculas de precisión, teléfonos móbiles, dous vehículos e diñeiro en efectivo.

Os arrestados foron postos a disposición do Xulgado de Instrución Número 1 de Santiago de Compostela, encargado de dirixir as actuacións.