O BNG, blindado ao redor de Pontón, proponse construír "o nacionalismo do S. XXI"

|

Gorettisanmartinrubencela


Unhas 2.400 persoas inscribíronse para participar na XVI Asemblea Nacional que o Bloque Nacionalista Galego (BNG) celebrará os días 25 e 26 de marzo na Coruña e que marcará o futuro da formación nacionalista, que virará ao redor da figura da actual portavoz nacional, Ana Pontón.


Nunha rolda de prensa celebrada este venres a responsable de Organización, Goretti Sanmartín, e o secretario de Comunicación, Rubén Cela, destacaron que os textos que levarán a debate neste plenario, no que se renovará a dirección, son o resultado dun proceso de debate "sen precedentes" no Bloque.


Deste xeito, tras reunir as achegas da militancia e simpatizantes a través do Proceso Adiante, Rubén Cela destacou que, ao longo deste último mes, o Bloque celebrou outras 25 asembleas comarcais, tanto en Galicia como na emigración, para o debate específico das teses que serán levadas á XVI Asemblea Nacional.


Para este máximo órgano de decisión, conforme sinalou Cela, presentáronse 296 emendas ao relatorio político e aos principios organizativos, 14 propostas ao informe de xestión da dirección saínte e 38 suxestións para actuacións futuras da organización.


RELATORIO


Precisamente, no relatorio político que será debatido na XVI Asemblea, o BNG eríxese en continuador do legado das Irmandades da Fala e do Partido Galeguista e márcase como "responsabilidade" construír "o nacionalismo do século XXI".


Ademais, deixa clara a súa vontade de "ser a forza unitaria" do nacionalismo galego para o que se define como un movemento sociopolítico "aberto" e "capaz de integrar" e incide en que debe "esforzarse" para que isto sexa así percibido pola sociedade.


Neste sentido, ábrese a "novas incorporacións colectivas e individuais" e subliña a súa disposición de chegar a "acordos electorais con forzas e colectivos de ámbito galego, baixo a premisa do respecto do principio de auto-organización".


Así mesmo, reitera a súa intención de "ir construíndo a vontade soberana do pobo galego no día a día, a través da autorganización, sen inxerencias externas ou inclusión en estruturas alleas e sen esperar un hipotético contexto estatal favorable".


Para iso, márcase como folla de ruta elaborar un plan de traballo denominado 'Estratexia Avanza Galicia' para o período 2017-2022, que estableza o rumbo para o "avance e a consolidación política, social e institucional do nacionalismo galego nos próximos anos á marxe das conxunturas electorais".


TESES ORGANIZATIVAS


Pola súa banda, en canto á tese de organización, os documentos que serán sometidos a debate no XVI Asemblea Nacional sinalan que o BNG debe "afrontar e promover cambios que melloren a súa vida interna e a relación coa sociedade".


Para iso, entre outras cuestións, propón "prestar especial coidado a todas as persoas que formen parte da casa común do nacionalismo", incide no asamblearismo como "forma básica de participación" e en a "transparencia tanto externa como interna" como obxectivo principal.


Ademais, subliña que o BNG "continua sendo o instrumento político máis válido para a articulación do nacionalismo en Galicia" e lembra que "a unidade e a cohesión interna son valores a preservar en todos os ámbitos da organización" para multiplicar as posibilidades de "penetración social e consolidación".


NOVA DIRECCIÓN


Na rolda de prensa, Rubén Cela tamén explicou que o Consello Nacional que terá lugar este sábado aprobará unha proposta de candidatura para a nova dirección con 50 integrantes, dos que os 19 primeiros corresponderían á nova executiva nacional, que incrementa os seus membros.


A candidatura, conformada en base aos 137 nomes enviados desde as comarcas, será sometida a votación na Asemblea Nacional pola totalidade das bases.


RESPECTO Á DECISIÓN "LEXÍTIMA" DE VENCE


O BNG asegurou respectar a decisión "lexítima" do seu ex-portavoz nacional Xavier Vence de pedir a baixa da formación e agradeceulle a súa achega no ámbito económico, no político e no organizativo nunha etapa "moi complexa".


"Son dos que penso que no BNG non sobra ninguén senón que falta xente, como a que está a entrar nos últimos meses, moi nova e con moitas ganas", manifestou Rubén Cela, que destacou a labor levado a cabo por Xavier Vence "nun contexto nada fácil" despois de "asumir a portavocía nun momento complexo".


Ademais, preguntado polos xornalistas sobre o feito de que tres de os catro últimos portavoces nacionais abandonasen a formación --Xosé Manuel Beiras, Anxo Quintana e Xavier Vence-- Rubén Cela considerou que "en democracia é imprescindible que calquera home ou muller poida participar nunha organización política" pero recoñeceu que "isto non debe ser obrigatorio".


"Son decisións lexítimas e persoais, o único que cabe é respectar", manifestou para incidir en que, "nestes momentos, está a entrar moita militancia nova". "Ninguén debe estar a contragusto nunha organización política", apuntou.

relacionada O BNG chama a participar na súa Asemblea para "relanzar o proxecto nacionalista"
relacionada Ana Pontón fía a renovación do BNG a sumar "a xente nova"

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Condicións de uso Consello editorial
Powered by Bigpress