Comeza este martes o xuízo polo asasinato da peregrina Denise Thiem

Oito mulleres e un home, como titulares, e dúas mulleres, como suplentes, conforman desde este luns o xurado popular que se encargará de xulgar o acusado polo asasinato de Denise Prikka Thiem, Miguel Ángel Muñoz, cando a peregrina estadounidense realizaba a etapa do Camiño de Santiago entre Castrillo de los Polvazares e Santa Catalina de Somoza en abril de 2015.

O xuízo arrincará este martes na Audiencia Provincial de León con primeira sesión a lectura dos escritos de cualificación das partes, as súas alegacións previas e o interrogatorio ao acusado Miguel Ángel Muñoz, para quen a acusación particular, exercida polo letrado Fernando Rodríguez Santocildes, pide unha pena de 20 anos de prisión por un delito de asasinato.

A estes súmase unha petición doutros catro anos por roubo con violencia, así como unha indemnización de 100.000 euros para o irmán da vítima, Cedric Kin Fai Thiem, e de 150.000 euros para Seng e Dalia Thiem, os pais de Denise.

Así, desde este martes e ata o próximo 4 de abril, o xurado deberá deliberar sobre os 15 feitos xusticiables propostos polo xuíz, para o que pasarán pola Audiencia Provincial de León máis de 80 testemuñas, entre eles máis de 60 policías.