Os horarios españois, únicos en Europa, volven ao debate social

O PP quere abrir o debate do cambio de hora na primavera e outono e propón que o Goberno faga un estudo socioeconómico para coñecer en detalle cal sería a incidencia económica global, así como a afectación á produtividade, a competitividade e a conciliación da vida profesional, persoal e familiar, de adaptarse ao fuso horario de Londres.

A través dunha proposición non de lei rexistrada no Congreso e recollida por Europa Press, os 'populares' alertan ao Goberno das diferenzas existentes entre os biorritmos e a organización de vida de España co resto de Europa por pertencer a un fuso horario diferente.

Concretamente apuntan que amence máis tarde o que leva a unha organización do traballo "singular" que permite unha longa pausa para comer e o alongamento da xornada, limitando a posibilidade de dispoñer de tempo propio, tanto para o lecer como para o descanso, a formación ou a familia.

"Isto leva a unha permanencia excesiva no lugar de traballo, co consecuente descenso da produtividade, á vez que se produce un incremento da tensión e do absentismo laboral. Ademais, o español atrasa a hora de ir á cama, fronte ao resto provoca que o tempo que os españois dedican de media ao sono non chegue ás oito horas recomendadas pola Organización Mundial da Saúde (OMS)", advirte a formación 'popular'.

BÁÑEZ PUXO O TEMA SOBRE A MESA

Todos estes datos contrastan coa actividade de calquera outro país europeo, onde, segundo apunta o texto rexistrado, se permite a existencia na tarde dun longo espazo de tempo no que os membros da familia poden desenvolver actividades compartidas, mellorando a posibilidade de conciliar o traballo coa nosa vida persoal, familiar e laboral.

A conciliación é tamén o motivo polo que a ministra de Emprego e Seguridade Social, Fátima Báñez, puxo o debate sobre o cambio do fuso horario sobre a mesa. Durante a súa comparecencia no Congreso, en decembro do ano pasado, Báñez asegurou que quería cambiar a xornada laboral en España, con carácter xeral, para que acabe ás 18.00 horas e tamén se referiu a un estudo das posibilidades que tería o cambio de fuso horario.

OS CIENTÍFICOS, EN CONTRA

Esta posibilidade foi cualificada de "disparate" por varios físicos consultados por Europa Press. O Catedrático do Departamento de Física Aplicada da Universidade de Santiago de Compostela, Jorge Mira, argumentou que "un cambio de fuso non só non arranxaría nada senón que mesmo traería problemas", mentres que o científico do Consello Superior de Investigacións Científicas (CSIC), José Fernández-Albertos, incidiu na idea de que é o sol o que "inflúe nos hábitos de vida".

"É certo que os hábitos si responden á posición do sol porque, aínda que sexa a mesma hora legal no leste e oeste peninsular, os hábitos sociais son diferentes porque a hora solar o é", aseverou.

Os científicos tamén mostraron o seu temor acerca de que esta posibilidade "está a razoarse sobre un mapa plano cando a Terra é redonda" e advertindo de que moitos dos argumentos que se están dando a favor do cambio de fuso "son falacias".